સુપ્રીમ કોર્ટે ચુંટણી પંચને શું કહ્યું ? જુઓ
કઈ વાતનું ધ્યાન રાખવા કહ્યું ?
સુપ્રીમ કોર્ટમાં ગુરુવારે ઇવીએમ-વીવીપેટ કેસ પર સુનાવણી હાથ ધરવામાં આવી હતી. આ દરમિયાન સર્વોચ્ચ અદાલતે ચૂંટણી પંચને કહ્યું હતું કે ચૂંટણી પ્રક્રિયામાં પવિત્રતા હોવી જોઈએ. ચૂંટણી પંચને સવાલ કરવામાં આવ્યો હતો કે તે સ્વતંત્ર અને નિષ્પક્ષ ચૂંટણીઓ કરાવવા માટે લેવામાં આવેલા પગલાઓની વિગતવાર માહિતી આપે. કોર્ટ વીવીપેટ સિસ્ટમ દ્વારા જનરેટ થયેલી સ્લિપ સાથે ઈલેક્ટ્રોનિક વોટિંગ મશીન ઇવીએમ દ્વારા પડેલા મતોને મેચ કરવાની માંગ કરતી અરજીઓની સુનાવણી કરી રહી છે.
અદાલતે ચુંટણી પંચને કહ્યું હતું કે ઇવીએમમાં ગરબડની ફરિયાદો પર ધ્યાન આપવામાં આવે . આના જવાબમાં ચુંટણી પંચે કહ્યું હતું કે બધી ચેકિંગ સહિતની કામગીરી ઉમેદવારોની હાજરીમાં જ કરવામાં આવે છે. કોર્ટમાં એવી દલીલ થઈ હતી કે કેરળમાં એક જગ્યાએ મોક પોલમાં ભાજપને જ મત જઈ રહ્યા હતા.
ન્યાયમૂર્તિ સંજીવ ખન્ના અને દીપાંકર દત્તાની બેન્ચે કહ્યું હતું કે “આ (એક) ચૂંટણી પ્રક્રિયા છે. તેમાં પવિત્રતા હોવી જોઈએ. કોઈને એવી આશંકા ન હોવી જોઈએ કે જે અપેક્ષા રાખવામાં આવે છે તે થઈ રહ્યું નથી.” ચૂંટણી પંચ તરફથી એડવોકેટ મનિન્દર સિંહ કોર્ટમાં હાજર થયા હતા, જ્યારે અરજદારો તરફથી એડવોકેટ નિઝામ પાશા અને પ્રશાંત ભૂષણ હાજર રહ્યા હતા.
સુનાવણી દરમિયાન વકીલ પ્રશાંત ભૂષણે કહ્યું હતું કે ઓછામાં ઓછો એવો આદેશ આપવો જોઈએ કે વીવીપેટ મશીન પારદર્શક હોવું જોઈએ અને તેમાં રહેલો બલ્બ સતત ચાલુ રહેવો જોઈએ, જેથી મતદારને સંપૂર્ણ પુષ્ટી મળી શકે. એડવોકેટ સંજય હેગડેએ જણાવ્યું હતું કે તમામ વીવીપેટ સ્લિપની ગણતરી કરવા માટે વિચારણા કરવી જોઈએ. જો હવે આ કરી શકાતું નથી તો અદાલતે હવે યોજાનારી ચૂંટણીની નિષ્પક્ષતાની ખાતરી કરવા માટે કેટલાક વચગાળાના આદેશો આપવા જોઈએ. બાકીના મુદ્દાઓ પછી સાંભળવા જોઈએ.
ઉમેદવારોની હાજરીમાં પ્રતીક અને સીરીયલ નંબર અપલોડ કરવામાં આવે છે: ચૂંટણી પંચ
સુનાવણી દરમિયાન ન્યાયાધીશે પૂછ્યું કે આ યુનિટમાં કઇ કઇ જાણકારી હોય છે? તે ક્યારે અપલોડ થાય છે? જવાબમાં અધિકારીએ કહ્યું હતું કે તેમાં સીરીયલ નંબર, સિમ્બોલ અને નામ હોય છે. તે ઉમેદવારોના પ્રતિનિધિઓની હાજરીમાં મતદાનના એક અઠવાડિયા પહેલા અપલોડ કરવામાં આવે છે. આ પછી તેને બદલી શકાય નહીં. તેમણે વધુમાં કહ્યું કે પ્રતિનિધિઓને એ વાતની પુષ્ટી કરાવવામાં આવે છે કે દબાવવામાં આવેલ બટનની સ્લિપ એ જ હતી જે VVPATમાંથી બહાર આવી હતી.
