રાજકોટ જિલ્લા પંચાયતમાં બે માસમાં ત્રણ ડેપ્યુટી ડીડીઓ બદલાયા
તાજેતરમાં જ ડેપ્યુટી ડીડીઓ (પંચાયત) તરીકે તરખાલાને મુકાયા હતા: હવે તેમના સ્થાને ગોસ્વામી મુકાયા
રાજકોટ જિલ્લા પંચાયતના ડેપ્યુટી ડીડીઓ (પંચાયત)ની ફરી એકવાર બદલી કરવામાં આવી છે. છેલ્લા બે માસ જેટલા સમયમાં જ ડેપ્યુટી ડીડીઓ (પંચાયત)માં ત્રીજા અધિકારીને મૂકવામાં આવ્યા છે.
લોકસભાની ચુંટણીને હવે ગણતરીના દિવસો જ બાકી છે ત્યારે છેલ્લા કેટલાક મહિનાઓથી સનદી સહિતના અધિકારીઓની બદલીઓનો દૌર ચાલુ છે. રાજકોટ જિલ્લા પંચાયતમાં પણ ડીડીઓ સહિતના અધિકારીઓની બદલી થઈ હતી. ડેપ્યુટી ડીડીઓ (પંચાયત) તરીકે ફરજ બજાવતા નાકીયાની પણ બદલી કરવામાં આવી હતી અને તેમને પ્રાંત ઓફિસર તરિકે અમરેલી મૂકવામાં આવ્યા હતા જ્યારે તેમની જગ્યાએ ચાર્જમાં એસ.એન.પટેલને મૂકવામાં આવ્યા હતા.
જો કે ત્યારબાદ ફરી બદલીના હુકમો થયા હતા અને દેવભુમી દ્વારકા જિલ્લામાં ડેપ્યુટી ડીડીઓ તરીકે રહેલા એન.એમ.તરખાલાને તા.૧૦/૦૨ના રોજ કરવામાં આવેલી બદલી દ્વારા રાજકોટ મૂકવામાં આવ્યા હતા. તેવામાં હવે ફરી એકવાર તરખાલાની ગીર સોમનાથમાં બદલી કરવામાં આવી છે અને તેમની જગ્યાએ ગાંધીનગરથી જય.એન.ગોસ્વામીને લોકસભાની ચુંટણી અંતર્ગત મૂકવામાં આવ્યા હોવાનું ચર્ચાઇ રહ્યું છે.
