દુશ્મનોને નિશાન બનાવી શકતી અગ્નિ -5 મિસાઈલનું સફળ પરીક્ષણ

વડાપ્રધાને ટ્વીટ કરીને જાણકારી સાથે વૈજ્ઞાનિકોને પાઠવ્યા અભિનંદન, સમગ્ર દેશ ગૌરવ અનુભવે છે,ભારતની અવકાશી તાકાત વધી

લોકસભા ચૂંટણી પહેલા વડાપ્રધાન નરેન્દ્ર મોદી રોજ દેશને નવી નવી સુવિધાઓ આપી રહ્યા છે, ખુશખબરી આપી રહ્યા છે ત્યારે હવે એમણે સોમવારે ટ્વિટ પર અગ્નિ-5 મિસાઈલનો ઉલ્લેખ કરી ડીઆરડીઓના વૈજ્ઞાનિકોને અભિનંદન પાઠવ્યા હતા. . તેમણે કહ્યું કે, વૈજ્ઞાનિકોએ ‘મિશન દિવ્યસ્ત્ર’ હેઠળ મલ્ટીપલ ઈન્ડિપેન્ડન્ટલી ટાર્ગેટેબલ રી-એન્ટ્રી વ્હીકલ ટેક્નોલોજી સાથે સ્વદેશી રીતે વિકસિત અગ્નિ-5 મિસાઈલનું પ્રથમ સફળ પરીક્ષણ કર્યું છે.

અગ્નિ-5 મિસાઈલનું સફળ પરીક્ષણ કરનાર વૈજ્ઞાનિકો પર ગર્વ છે. દેશ ખૂબ જ ગૌરવ અનુભવી રહ્યો છે. અવકાશી શક્તિમાં ભારત સૌથી આગળ નીકળી રહ્યો છે.

મહત્વની વાત એ છે કે આ મિસાઇલ હોંગકોંગ સહિત સમગ્ર ચીનને નિશાન બનાવી શકે છે. દેશના દુશ્મનોને જડબાતોડ જવાબ આપી શકે છે.

અગ્નિ શ્રેણીની ઇન્ટરકોન્ટિનેન્ટલ બેલેસ્ટિક મિસાઇલ ડીઆરડીઓ અને ભારત ડાયનેમિક્સ લિમિટેડ દ્વારા સંયુક્ત રીતે વિકસાવવામાં આવી છે. નવી અગ્નિ મિસાઈલની ફાયર કરવાની ક્ષમતા 5000થી 8000 કિમી છે. આ મિસાઈલનું વજન 50 ટન છે. તેમજ અગ્નિ-5 ની ઊંચાઈ 17 મીટર અને વ્યાસ 2 મીટર છે અને તે 1.5 ટન સુધીના પરમાણુ હથિયાર લઈ જવા માટે સક્ષમ છે.

ઇન્ટર-કોન્ટિનેન્ટલ બેલિસ્ટિક મિસાઇલ સિસ્ટમ ધરાવતી આવી મિસાઇલ બહુ ઓછા દેશો પાસે છે, જેમાં પાકિસ્તાન પાસે આવી મિસાઇલ નથી. જ્યારે અમેરિકા, ચીન, રશિયા, ફ્રાન્સ, ઉત્તર કોરિયા પાસે છે. ઉલ્લેખનીય છે કે, ભારત પાસે પહેલાથી જ 700 કિમીની રેન્જવાળી અગ્નિ-1, 2000 કિમીની રેન્જવાળી અગ્નિ-2, 2,500 કિમીથી 3,500 કિમીની રેન્જવાળી અગ્નિ-3 મિસાઈલ છે. જ્યારે અગ્નિ-4 અને અગ્નિ-5 ચીનને ધ્યાનમાં રાખીને તૈયાર કરવામાં આવી છે.

હવે એ પણ સુનિશ્ચિત થશે કે એક જ મિસાઇલને વિભિન્ન સ્થાનો પર અનેક યુધ્ધ મોરચા પર તૈનાત કરી શકાશે. આ યોજનાના નિર્દેશક એક મહિલા હતા. તેમાં અન્ય ઘણી મહિલાઓનું પણ યોગદાન રહ્યું છે.