રાજ્યસભાની ચૂંટણી માટે ભાજપના આ ચાર ઉમેદવારોએ ભર્યા ફોર્મ ..જુઓ

જેપી નડ્ડા અને ગોવિંદભાઈ ધોળકિયા સહિત ભાજપના ચાર ઉમેદવારોએ ફોર્મ ભર્યા

ગુજરાતમાંથી ઉમેદવારી કરવાની તક આપવા બદલ વડાપ્રધાનનો આભાર માનતા રાષ્ટ્રીય પ્રમુખ

રાજ્યસભાની ચૂંટણી માટે ભાજપના ચારેય ઉમેદવારો જેપી નડ્ડા,ગોવિંદભાઈ ધોળકીયા, મયંક નાયક અને ડૉ.જશવંતસિંહ પરમારે ગાંધીનગરમાં ઉમેદવારી પત્રક રજુ કર્યા હતા. આ પ્રસંગે મુખ્યમંત્રી ભુપેન્દ્રભાઈ પટેલ, પ્રદેશ પ્રમુખ સી.આર.પાટિલ સહિતના અગ્રણીઓ ઉપસ્થિત રહ્યા હતા.

આ પહેલા આજે ભાજપના રાષ્ટ્રીય અધ્યક્ષ જે.પી.નડ્ડા અમદાવાદ પહોંચ્યા હતા. જ્યાં સી.આર.પાટીલ અને મુખ્યમંત્રીએ તેમનું સ્વાગત કર્યું હતું. જે.પી. નડ્ડા સચિવાલયના ગેટ નંબર 7થી વિધાનસભા સુધી રેલી સ્વરૂપે પહોંચ્યાં હતા. 4 હજાર જેટલા કાર્યકરો અને આગેવાનો રેલીમાં જોડાયા હતા. રેલીમાં નાસિકના ઢોલ, શરણાઈ વગેરે માટે વ્યવસ્થા કરાઇ હતી.

ભાજપના કાર્યકરોને સંબોધતા જે.પી. નડ્ડાએ કહ્યું હતું કે, ગુજરાત સાથે જોડાવવાનુ મને સૌભાગ્ય પ્રાપ્ત થયું છે. ગુજરાતથી રાજ્યસભામાં જવુ તે સૌભાગ્યની વાત છે. મને ગુજરાતથી ઉમેદવારી કરવાનો મોકો આપવા બદલ વડાપ્રધાન મોદીનો આભાર માનું છું.

તેમણે કહ્યું હતુ કે અમારો ટાર્ગેટ છે કે અમે NDAને 400ને પાર કરી દઈશું અને અમે 370થી વધુ બીજેપીના ઉમેદવારોને જીતાડીશું. હું તમને બધાને ખાતરી આપું છું કે, એક આદર્શ સાંસદ તરીકે મને જે પણ કામ સોંપવામાં આવશે તે હું સારી રીતે નિભાવીશ અને એક કાર્યકર તરીકે તમારી સાથે મારી જાતને જોડીશ. આપણે બધા વડાપ્રધાન મોદીના વિકસિત ભારતના સંકલ્પને હાંસલ કરવાની દિશામાં આગળ વધી રહ્યા છીએ. એક સાંસદ તરીકે હું ભાગ્યશાળી છું કે હું ગુજરાતમાંથી આ કાર્યને આગળ ધપાવી રહ્યો છું.