દેશમાં કઈ પાર્ટીને કેટલું મળ્યું ડોનેશન ? જુઓ

ભાજપને કેટલા ટકા વધુ મળ્યું ?

દેશમાં સૌથી વધુ ડોનેશન ભાજપને જ મળે છે અને આ પરંપરા જળવાઈ રહી છે. મોટા ભાગના લોકો, બિઝનેસમેનો ભાજપ પર જ વિશ્વાસ રાખે છે તે ફરી બહાર આવ્યું હતું. આગામી લોકસભા ચૂંટણી પહેલા ભાજપે તેને મળેલી દાનની રકમ ખુલાસો કરી દીધો હતો. પાર્ટીને 2022-23 દરમિયાન 720 કરોડ રૂપિયાનું દાન મળ્યું હતું. જે દેશની ચાર મુખ્ય રાજકીય પાર્ટીઓ કોંગ્રેસ, આમ આદમી પાર્ટી, સીપીઆઈએમ અને નેશનલ પીપલ્સ પાર્ટીને મળેલા કુલ દાન કરતાં પાંચ ગણું વધારે છે. આ માહિતી એસોસિએશન ફોર ડેમોક્રેટિક રિફોર્મ્સ એટલે કે એડીઆરએ તેના રિપોર્ટમાં જાહેર કરી હતી.

છઠ્ઠી રાષ્ટ્રીય પાર્ટી બહુજન સમાજ પાર્ટી (બસપા) ને નાણાકીય વર્ષ 2022-23 દરમિયાન 20,000 રૂપિયાથી વધુનું કોઈ દાન મળ્યું નથી. પાર્ટી છેલ્લા 17 વર્ષથી સતત તેને મળી રહેલા દાનનો ખુલાસો કરી રહી છે. ઉલ્લેખનીય છે કે રજિસ્ટર્ડ રાજકીય પક્ષોએ 20,000 રૂપિયાથી વધુના દાન તરીકે મળેલી કોઈપણ રકમ જાહેર કરવી પડે છે.

ભાજપને 7,945 લોકોએ દાન આપ્યું છે. જેમણે ભાજપને 719.08 કરોડ રૂપિયા દાન કર્યા છે. જ્યારે કોંગ્રેસ પાર્ટીને 894 લોકોએ ડોનેશનમાં 79.92 કરોડ રૂપિયા આપ્યા હતા. ઉલ્લેખનીય છે કે કોંગ્રેસ, આમ આદમી પાર્ટી, નેશનલ પીપલ્સ પાર્ટી (એનપીપી) અને સીપીઆઈ (એમ) ને આ સમાન સમયગાળા દરમિયાન મળેલા કુલ દાન કરતાં ભાજપને મળેલું દાન પાંચ ગણું વધુ છે. ઉત્તર-પૂર્વમાં એનપીપી એકમાત્ર રાજકીય પક્ષ છે જેને રાષ્ટ્રીય પક્ષનો દરજ્જો છે.

એડીઆરએ એ પણ જાહેર કર્યું કે રાષ્ટ્રીય પક્ષોને દિલ્હીમાંથી કુલ રૂ. 276.202 કરોડનું દાન મળ્યું હતું, ત્યારબાદ ગુજરાતમાંથી રૂ. 160.509 કરોડ અને મહારાષ્ટ્રમાંથી રૂ. 96.273 કરોડ મળ્યા હતા. નાણાકીય વર્ષ 2022-23 દરમિયાન રાષ્ટ્રીય પક્ષોના કુલ દાનમાં રૂ. 91.701 કરોડનો વધારો થયો છે, જે અગાઉના નાણાકીય વર્ષ 2021-22 કરતાં 12.09 ટકા વધુ છે.