હુથી બળવાખોરોએ ફરી શું કર્યું ? વાંચો

• રાતા સમુદ્રમાં કોના પર હુમલા કર્યા ?

યમનના હુથીઓએ રાતા સાગરમાં ફરી કેટલાક જહાજો પર ડ્રોનથી હુમલો કર્યો હતો. અમેરિકા-ફ્રાન્સ જેવા દેશોની ચેતવણી છતાં હુથી હુમલાખોરો હુમલા કરી રહ્યા છે. છેલ્લા એક મહિનામાં રાતા સાગરમાં ઘણા દેશોના જહાજો પર ડઝનથી વધુ હુમલા કરાયા છે. પરંતુ હજુ સુધી હુમલામાં કોઈપણ મોત થયું હોવાની પુષ્ટી થઈ નથી.

યમનના હુથી હુમલાખોરોએ મંગળવારે મોડી રાત્રે રાતા સાગરમાં જહાજોને નિશાન બનાવી ડ્રોન અને મિસાઈલોથી હુમલા કર્યા હતા. હુમલામાં હાલ કોઈપણ જહાજને નુકસાન થયું હોવાના અહેવાલો નથી, તેમ અધિકારીઓએ આજે જણાવ્યું છે.

ખાનગી ગુપ્તચર કંપની એમ્બ્રેએ જણાવ્યું કે, ‘યમનના બંદર શહેરો હોદ્દેઈદા અને મોખા પાસે હુમલા કરાયા છે. જહાજ દ્વારા અમેરિકા અને તેના સહયોગી દેશોના યુદ્ધ જહાજોને હુમલાની માહિતી મોકલાઈ હતી. ત્યારબાદ યુદ્ધ જહાજોએ તે જહાજોને વધુ સ્પીડે આગળ વધવાનો આદેશ આપ્યો હતો.’

બ્રિટન સેનાના ‘યૂનાઈટેડ કિંગડમ મરીન ટ્રેડ ઑપરેશન્સ’એ કહ્યું કે, ‘અમને હોદ્દેઈદા પાસે હુમલો થયો હોવાની માહિતી મળી છે. ગઠબંધન દળ જવાબી કાર્યવાહી કરી રહ્યા હતા. જાનમાલને નુકસાન થયું હોવાના અહેવાલો નથી. જહાજોને સલાહ અપાઈ છે કે, તેઓ આગળ વધતા રહે અને કોઈપણ શંકાસ્પદ પ્રવૃત્તિની અમને માહિતી આપે.’
2014થી યમનની રાજધાની પર કબજો જમાવી બેઠેલા હુતી શિયા વિદ્રોહિઓએ હુમલા અંગે કોઈપણ સત્તાવાર નિવેદન આપ્યું નથી, પરંતુ સમાચાર એજન્સી અલ જજીરાએ એક હુથી સૈન્ય અધિકારીને ટાંકીને કહ્યું કે, ‘રાતા સાગરમાં ઈઝરાયેલ સાથે સંકળાયેલા જહાજને નિશાન બનાવાયું.’ હુથી વિદ્રોહિયોએ કહ્યું કે, ‘અમારા હુમલાનો મુખ્ય હેતુ ગાઝામાં હમાસ વિરુદ્ધ ઈઝરાયેલના હુમલા બંધ કરવાનો છે.’