૧૪ કલાકમાં જ ટેસ્ટ મેચ જીતી ઇતિહાસ રચતું ભારત

૩૧ વર્ષ બાદ આફ્રિકાને કેપટાઉનમાં આપ્યો પરાજય: દોઢ દિવસની રમતમાં ૧૦૬.૨ ઓવર ફેંકાઈ જેમાં પડી ૩૩
વિકેટ, રન બન્યા માત્ર ૪૬૪! શ્રેણી ૧-૧થી ડ્રો

ભારતે સાઉથ આફ્રિકા વિરુદ્ધ કેપટાઉન ટેસ્ટ મેચમાં ૭ વિકેટે શાનદાર જીત હાંસલ કરી છે. આ મેચ માત્ર ૧૪ કલાક સુધી જ ચાલી હતી. મુકાબલાના બીજા જ દિવસે ભારતને જીત માટે ૭૯ રનનો લક્ષ્યાંક મળ્યો હતો જે તેણે આસાનીથી હાંસલ કર્યો હતો. આ જીત સાથે જ ભારતીય ટીમે બે મેચની ટેસ્ટ શ્રેણીને ૧-૧થી બરાબર કરી લીધી છે. મહત્ત્વની વાત એ છે કે ૩૧ વર્ષ બાદ આફ્રિકા સામે કેપટાઉનમાં ટીમ ઈન્ડિયાએ જીત મેળવી છે. દોઢ દિવસ ચાલેલી મેચમાં કુલ ૧૦૬.૨ ઓવર ફેંકાઈ હતી જેમાં ૩૩ વિકેટ પડી હતી સામે રન માત્ર ૪૬૪ જ બન્યા હતા. આ મેચમાં પ્લેયર ઑફ ધ મેચ તરીકે મોહમ્મદ સીરાજ અને પ્લેયર ઑફ ધ સિરીઝ તરીકે ડીન એલ્ગર-જસપ્રિત બુમરાહની સંયુક્ત રીતે પસંદગી થઈ હતી.

ભારતીય ટીમની કેપટાઉનમાં આ પહેલી ટેસ્ટ જીત રહી હતી. અગાઉ અહીં ભારતને ૬ ટેસ્ટમાં ૪ વખત હારનો સામનો કરવો પડ્યો હતો તો ૨ મેચ ડ્રો રહી હતી. ભારતીય ટીમ ૧૯૯૨થી આફ્રિકાની ધરતી પર દ્વિપક્ષીય ટેસ્ટ શ્રેણી રમતી આવી છે પરંતુ તેણે કેપટાઉનમાં એક પણ ટેસ્ટ જીત મેળવી નથી. હવે તેણે અહીં જીતનું ખાતું ખોલાવ્યું છે સાથે સાથે કોઈ એશિયન દેશની પણ કેપટાઉનમાં આ પહેલી ટેસ્ટ જીત છે.

ભારતીય ટીમ માટે બીજી ઈનિંગમાં યશસ્વી જયસ્વાલે ૨૩ દડામાં ૨૮ રન બનાવ્યા જ્યારે રોહિત શર્મા ૧૭ રન બનાવીને અણનમ રહ્યો હતો. આ બન્ને ઉપરાંત વિરાટ કોહલી ૧૨ અને શુભમન ગીલ ૧૦ રન બનાવી આઉટ થયા હતા.

મેચના બીજા દિવસે આફ્રિકી ટીમ પોતાની બીજી ઈનિંગમાં ત્રણ વિકેટે ૬૨ રનના સ્કોરથી આગળ રમવા ઉતરી હતી. બીજા દિવસે આફ્રિકાને પહેલી ઓવરમાં જ ઝટકો લાગ્યો જ્યારે ડેવિડ બેડિંઘમને બુમરાહે આઉટ કર્યો હતો. આ પછી બુમરાહે કાઈલ વેરિયેનેનને પણ સસ્તામાં આઉટ થયો હતો. આ પછી માર્કો જાન્સેન, કેશવ મહારાજ સહિતની વિકેટ પડી હતી. જો કે કેપ્ટન એડેન માર્કરમે એક છેડો સાચવી રાખી ૯૯ દડામાં પોતાની સદી પૂર્ણ કરી હતી. માર્કરમની વિકેટ મોહમ્મદ સીરાજે લીધી હતી.

આફ્રિકાની બીજી ઈનિંગ ૧૭૬ રનમાં જ પૂરી થઈ હતી. ભારતને પહેલી ઈનિંગમાં ૯૮ રનની લીડ મળી હતી આવામાં આફ્રિકાએ ભારતને જીત માટે ૭૯ રનનો લક્ષ્યાંક આપ્યો હતો. ભારત વતી બીજી ઈનિંગમાં બુમરાહે છ, મુકેશ કુમારે બે અને પ્રસિદ્ધ-સીરાજને એક-એક વિકેટ મળી હતી.

કુલ ૩૩ વિકેટ પડી, એલબીડબલ્યુ એક પણ નહીં !
ભારત-આફ્રિકા વચ્ચે કેપટાઉન ટેસ્ટમાં અનેક રેકોર્ડ બન્યા છે જેમાં એક રેકોર્ડ એવો પણ નોંધાયો છે કે મેચ દરમિયાન કુલ ૩૩ વિકેટ પડી હતી પરંતુ તેમાંથી એક પણ વિકેટ એલબીડબલ્યુ પડી નથી ! કેપટાઉનની પીચ બાઉન્સી હોવાને કારણે કાં તો બેટર કેચઆઉટ કાં તો બોલ્ડ આઉટ જ થયો છે.