હમાસ અને પુતીન સિક્કાની બે બાજુ સમાન: બાઇડેન
બંને લોકશાહીને ખતમ કરવા માંગે છે
એક આતંકી બીજો અત્યાચારી
એક અપવાદરૂપ કિસ્સા તરીકે અમેરિકાના પ્રમુખ જો બાયડને ગુરુવારે આવેલ ઓફિસમાંથી રાષ્ટ્રજોગ પ્રવચન કર્યું હતું. તેમાં તેમણે હમાસ અને પુતીન ઉપર આકરા પ્રહાર કર્યા હતા. આ ભાષણ દ્વારા તેમણે અમેરિકા યુક્રેન અને ઇઝરાયેલની પડખે જ હોવાનો પુનરોચ્ચાર કર્યો હતો.
તેમણે કહ્યું કે હમાસ અને પુતીન બંને તરફથી અલગ અલગ ખતરો છે પણ બંનેમાં એક સામ્ય એ છે કે એ બંને પોતાના પાડોશી દેશોમાં લોકશાહીને ખતમ કરવા માંગે છે.
અત્યંત ભાવુક ઉદબોધનમાં તેમણે કહ્યું કે એક મહાન રાષ્ટ્ર તરીકે આપણે શુદ્ર, પક્ષપાતી અને ગુસ્સાની રાજનીતિને આપણી જવાબદારીના માર્ગમાં ન આવા દઈ શકીએ. તેમણે ઉમેર્યું કે હમાસ જેવા આતંકવાદી અને પુતીન જેવા અત્યાચારીને આપણે જીતવા નહીં દઈએ.
અમેરિકા વિશ્વની દીવાદાંડી
ભાષણમાં તેમણે ઉમેર્યું કે તેઓ યુક્રેન અને ઇઝરાયેલને 100 અબજ ડોલરની જંગી સહાય કરવા માટે કોંગ્રેસ પાસે માંગણી કરશે. આ સહાય અમેરિકાના વૈશ્વિક નેતૃત્વના દરજ્જા માટેનું ભાવી રોકાણ હોવાનું તેમણે જણાવ્યું હતું. તેમણે વિશેષમાં જણાવ્યું કે અમેરિકાનું નેતૃત્વ જ વિશ્વને એક રાખે છે. અમેરિકાના સાથે રાષ્ટ્રો જ અમેરિકાને સલામત રાખે છે. અમેરિકાના મૂલ્યો જ અન્ય રાષ્ટ્રો સાથેની ભાગીદારીની કરોડરજ્જુ છે. તેમણે ભારપૂર્વક કહ્યું કે અમેરિકા વિશ્વ માટે દીવાદાંડી છે. હજુ પણ,હજુ પણ..
કોંગ્રેસ લકવાગ્રસ્ત છે, સહાય સામે વિરોધનો સુર
બે અઠવાડિયાથી હાઉસ ઓફ રીપ્રેઝેન્ટેટીવસ ના સ્પીકર નક્કી નથી થઈ શક્યા. કોંગ્રેસ લકવાગ્રસ્ત થઈ ગઈ છે. પ્રેસિડેન્ટ બાઈડેન કોંગ્રેસ પાસે યુક્રેન માટે 60 અબજ ડોલરની અને ઇઝરાયેલ માટે 10 અબજ ડોલરની સહાય મંજૂર કરવાની માગણી કરવાના છે પણ આ અગાઉ અમેરિકાએ યુક્રેનને 43.9 અબજ ડોલરની સહાયનું વચન આપ્યું હતું તેની સામે પણ જમણેરી કટ્ટરપંથી સાંસદો વિરોધ કરી રહ્યા છે. આ સંજોગોમાં નવી સહાય મંજૂર કરાવવાનું કપરું બનશે તેવું માનવામાં આવે છે.
બાઈડનના ભાષણનું શા માટે અદકેરું મહત્વ?
ઓવેલ ઓફિસમાંથી સામાન્ય રીતે અમેરિકા પ્રમુખ અત્યંત રાષ્ટ્રીય મહત્વ ધરાવતા પ્રસંગે જ ઉદબોધન કરે તેવી પરંપરા છે. બાઈડને તેમના કાર્યકાળ દરમિયાન જૂન મહિનામાં અમેરિકા ડેટ ડિફોલ્ટની કગારે પહોંચી ગયું ત્યારે એક જ વખત એ સ્થળેથી ભાષણ કર્યું હતું.
આ સંજોગોમાં ઓવેલ ઓફિસમાંથી રાષ્ટ્રને ઉદબોધન કરવાની તેમની ચેષ્ટાને ખૂબ મહત્વની માનવામાં આવે છે.
