બ્રાઉન સુગર, એમડી, મેથાએમફેટામાઈન સહિતનું ડ્રગ્સ કબજે લેતું એસઓજી: રાજસ્થાનથી ડ્રગ્સ લાવ્યા બાદ બમણી કિંમતે વેચી નાખતો
સ્પેશ્યલ ઓપરેશન ગ્રુપ (એસઓજી)એ રાજકોટમાં પાંચ વર્ષથી કોડનેમ દવા' રાખી ડ્રગ્સનું વેચાણ કરતાં પેડલરને પકડી પાડ્યો છે. પેડલરના કબજામાંથી બ્રાઉનસુગર, મેફેડ્રોન (એમડી), મેથાએમ્ફેટામાઈન (નશીલું દ્રવ્ય) સહિતનો જથ્થો મળી આવ્યો છે. મોટાભાગે ડ્રગ્સનું આ વેચાણ પકડાયેલો પેડલર યુવાનોને જ કરતો હોવાનું ખુલતાં હવે બંધાણીઓની પણ પોલીસે શોધખોળ શરૂ કરી છે. પોલીસ કમિશનર રાજુ ભાર્ગવનાસે નો ટુ ડ્રગ્સ’ અભિયાન અંતર્ગત પોલીસ દ્વારા શહેરમાં ડ્રગ્સના દૂષણને ડામવા માટે કમર કસી લેવામાં આવી છે.
દરમિયાન એસઓજી પીઆઈ જે.ડી.ઝાલા, હેડ કોન્સ્ટેબલ જીજ્ઞેશ અમરેલિયા, અજય ચૌહાણ, અરુણ બાંભણીયા, કિશોરભાઈ ઘુઘલ, દિવ્યરાજસિંહ ઝાલા સહિતના સ્ટાફે ગોકુલનગર આવાસ યોજનાના ક્વાર્ટર (સંતકબીર રોડ)માં દરોડો પાડીને મયુર જમનભાઈ અજાણી (ઉ.વ.૩૯)ને પકડી પાડ્યો હતો અને તેના કબજામાંથી ડ્રગ્સ, ઈન્જેક્શન, વજનકાંટો મળી કુલ રૂા.૩,૨૦,૧૫૦નો મુદ્દામાલ કબજે લેવામાં આવ્યો છે.
મયુરની પૂછપરછમાં તેણે જણાવ્યું કે તે ડ્રગ્સનો જથ્થો છેલ્લા પાંચ વર્ષથી લાવીને રાજકોટમાં વેચતો હતો. જો કે તે બાંધેલા' ગ્રાહકોને જ ડ્રગ્સ વેચતો હોવાથી અત્યાર સુધી કોઈના ધ્યાન ઉપર આવ્યો ન્હોતો. તેણે ડ્રગ્સનું કોડનેમ દવા રાખ્યું હતું એટલા માટે ગ્રાહકો તેનેદવા છે કે નહીં’ તેવું પૂછતા હોય કોઈને શંકા જઈ રહી ન્હોતી. રાજસ્થાનથી તે ડ્રગ્સ લાવીને બમણી કિંમતે યુવાનોને વેચતો હોવાનું મયુરે જણાવતાં પોલીસે હવે મુળ સુધી પહોંચવા તજવીજ શરૂ કરી છે.
મયુર પોતે ગાંજાનો બંધાણી
પોલીસ તપાસમાં એવું પણ ખુલ્યું છે કે મયુર અજાણી પોતે ગાંજાનો બંધાણી છે. જો કે તે ડ્રગ્સનું સેવન કરતો ન્હોત પરંતુ બંધાણીઓનો મોબાઈલ પર જ ઓર્ડર લઈને વેચી રહ્યો હતો. પાંચ-પાંચ વર્ષથી મયુર ડ્રગ્સ વેચી રહ્યો હોય અત્યાર સુધી તેણે કેટલો જથ્થો વેચ્યો હશે તેની કલ્પના જ કરવી ઘટે. પરિવારમાં હાલ તે માતા સાથે રહે છે અને પિતા હયાત નથી. મયુર અગાઉ મારામારી જેવા ગુનામાં પોલીસ ચોપડે ચડી ચૂક્યો છે.
