2027ની ચૂંટણી પહેલાં સૌરાષ્ટ્રનું રાજકારણ ગરમાયું: દેવજી ફતેપરાના દાવા બાદ બાવળિયાની નિવૃત્તિની માંગ, સમાજમાં બે ફાંટા

ગુજરાત વિધાનસભાની 2027 ની ચૂંટણીને હજુ ઘણો સમય બાકી છે, પરંતુ તે પહેલાં જ સૌરાષ્ટ્ર અને ખાસ કરીને જસદણ-રાજકોટના રાજકારણમાં ભારે ગરમાવો આવી ગયો છે. કેબિનેટ મંત્રી કુંવરજી બાવળિયાના સ્નેહમિલન કાર્યક્રમમાં પૂર્વ સાંસદ દેવજી ફતેપરા દ્વારા આગામી ચૂંટણીમાં બાવળિયાની ટિકિટ અને મંત્રીપદ અંગે જાહેર મંચ પરથી દાવો કરવામાં આવતાં રાજકીય ખળભળાટ મચી ગયો છે. આ નિવેદન બાદ હવે ખુદ કોળી સમાજમાંથી જ કુંવરજી બાવળિયા સામે વિરોધનો વંટોળ ઊભો થયો છે અને તેમને રાજકારણમાંથી નિવૃત્તિ લઈ લેવાની માંગણી કરવામાં આવી છે.

દેવજી ફતેપરાનો દાવો અને વિરોધીઓ પર કટાક્ષ

જસદણ બેઠક પર ભાજપના આંતરિક જૂથવાદ વચ્ચે યોજાયેલા કોળી સમાજના શક્તિપ્રદર્શન અને સ્નેહમિલનમાં પૂર્વ સાંસદ દેવજી ફતેપરાએ સ્ટેજ પરથી જાહેરાત કરી હતી કે, “અમારા સમાજમાંથી આવા કદાવર નેતા ક્યારેય આવ્યા નથી; કુંવરજી બાવળિયા જ 2027 ની વિધાનસભા ચૂંટણી લડશે અને ફરીવાર મંત્રી પણ બનશે.” આ દરમિયાન તેમણે સ્થાનિક દાવેદારો અને વિરોધીઓ પર આકરો કટાક્ષ કરતાં કહ્યું હતું કે એવા ઘણા લોકો છે જે સરપંચ બનવાને લાયક પણ નથી, છતાં વિધાનસભાની ચૂંટણી લડવા માટે ટિકિટો માંગી રહ્યા છે.

પ્રવીણ કોળીનો આકરો પલટવાર: ‘હવે યુવાનોનો સમય છે, નિવૃત્તિ લઈ લો‘

દેવજી ફતેપરાના આ નિવેદન બાદ કોળી સમાજના અગ્રણી પ્રવીણ કોળીએ સામે આવીને આકરા પ્રહારો કર્યા છે. તેમણે સ્પષ્ટ શબ્દોમાં જણાવ્યું હતું કે જસદણમાં યોજાયેલું સ્નેહમિલન સંમેલન સામાજિક રહેવાને બદલે સંપૂર્ણપણે રાજકીય બની ગયું હતું અને તેને સમાજના હિત સાથે કોઈ લેવાદેવા નથી. પ્રવીણ કોળીએ કુંવરજી બાવળિયા પર નિશાન સાધતાં કહ્યું કે તેમણે હવે સક્રિય રાજકારણમાંથી નિવૃત્તિ લઈ લેવી જોઈએ, કારણ કે દેશ હવે યુવાનોના હાથમાં જઈ રહ્યો છે અને ભારતીય જનતા પાર્ટી પણ હવે ‘જેન-ઝી’ (Gen-Z) એટલે કે યુવા નેતાઓને તક અને ટિકિટ આપવામાં રસ દાખવી રહી છે.

આ પણ વાંચો: ન્યૂઝીલેન્ડ સામે ચોથી વનડેમાં ભારતનો 244 રને શરમજનક પરાજય: રોહિત-વિરાટ-શ્રેયસ શૂન્ય પર આઉટ, મેટ હેનરીની 6 વિકેટ

7 વર્ષે પણ કોળી સમાજનું વિદ્યાર્થી ભવન ન બન્યાનો આક્ષેપ

પ્રવીણ કોળીએ કુંવરજી બાવળિયાની કાર્યશૈલી સામે સવાલો ઉઠાવતાં ગંભીર આક્ષેપ કર્યો હતો કે તેઓ માત્ર સમાજના નામે રાજકારણ કરીને ચૂંટણીઓ લડે છે, પરંતુ સમાજને આપેલા પાયાના વાયદાઓ પૂર્ણ કરતા નથી. તેમણે યાદ અપાવ્યું હતું કે કોળી સમાજના વિદ્યાર્થીઓના અભ્યાસ માટે વિદ્યાર્થી ભવન બનાવવાનો વાયદો કરવામાં આવ્યો હોવા છતાં સાત વર્ષ વીતી ગયા પછી પણ તેનું નિર્માણ થઈ શક્યું નથી. આ મુદ્દાઓને લઈને હાલ કોળી સમાજમાં જ બે સ્પષ્ટ ફાંટા પડતા જોવા મળી રહ્યા છે.

જસદણ-રાજકોટ રાજકીય વિવાદની મુખ્ય વિગતો

વિધાનસભા ચૂંટણીના ઘણા સમય અગાઉ જસદણ બેઠક પર ટિકિટની દાવેદારી અને વર્ચસ્વને લઈને શરૂ થયેલો આ વિવાદ આગામી દિવસોમાં ભાજપના સ્થાનિક સંગઠન માટે માથાનો દુખાવો બની શકે છે. એક તરફ જૂના જોગીઓ પોતાનું સ્થાન અકબંધ રાખવા શક્તિપ્રદર્શન કરી રહ્યા છે, તો બીજી તરફ સમાજમાંથી જ યુવા નેતૃત્વ અને અધૂરા વિકાસકામોના મુદ્દે ઊઠેલો વિરોધ સૂચવે છે કે સૌરાષ્ટ્રના કોળી રાજકારણમાં આંતરિક સમીકરણો ઝડપથી બદલાઈ રહ્યા છે.