IIM-Aમાં 392માંથી 6ને જ વિદેશમાં પ્લેસમેન્ટ: હાઈએસ્ટ પેકેજ ₹81 લાખ
દેશની સર્વોચ્ચ અને વૈશ્વિક સ્તરે નામના ધરાવતી બિઝનેસ સ્કૂલ ‘ઇન્ડિયન ઇન્સ્ટિટ્યૂટ ઑફ મેનેજમેન્ટ અમદાવાદ’ (IIM-A) દ્વારા એમબીએના વિદ્યાર્થીઓનું ફાઇનલ પ્લેસમેન્ટ પૂર્ણ થયા બાદ તેનો સત્તાવાર રિપોર્ટ જાહેર કરવામાં આવ્યો છે. આ રિપોર્ટમાં વિદ્યાર્થીઓને મળેલા અધધ પેકેજોની સાથે-સાથે આંતરરાષ્ટ્રીય પ્લેસમેન્ટ અને એન્ટરપ્રિન્યોરશિપના ચોંકાવનારા આંકડાઓ પણ સામે આવ્યા છે.
પ્લેસમેન્ટ પ્રક્રિયા અને આંતરરાષ્ટ્રીય જોબ્સ
આ વર્ષે ફાઇનલ પ્લેસમેન્ટ માટે કુલ ૩૯૮ વિદ્યાર્થીઓએ સંસ્થાના માધ્યમથી ભાગ લીધો હતો (જ્યારે ૧૦ વિદ્યાર્થીઓએ પ્લેસમેન્ટ માંગ્યું ન હતું). તેમાંથી ૩૮૬ વિદ્યાર્થીઓને ભારતમાં જ અલગ-અલગ શહેરોમાં રોજગારી પ્રાપ્ત થઈ છે, જ્યારે માત્ર ૬ વિદ્યાર્થીઓને જ આંતરરાષ્ટ્રીય પ્લેસમેન્ટ મળ્યું છે. વિદેશમાં નોકરી મેળવનારા આ ૬ વિદ્યાર્થીઓ પૈકી ૪ ને દુબઈમાં, ૧ ને હોંગકોંગમાં અને ૧ ને જાપાનમાં સ્થાન મળ્યું છે. ગત વર્ષની સરખામણીએ આંતરરાષ્ટ્રીય પ્લેસમેન્ટ મેળવનાર વિદ્યાર્થીઓની સંખ્યામાં ૪ નો વધારો થયો છે.
આ પણ વાંચો: અમદાવાદમાં દર વર્ષે 20થી વધુ ટ્રાન્સજેન્ડરનો ઉમેરો
સેલેરી પેકેજ: ડોમેસ્ટિક અને ઈન્ટરનેશનલ આંકડા
ડોમેસ્ટિક (ભારત): ભારતમાં નોકરી મેળવનારા વિદ્યાર્થીઓનું એવરેજ પેકેજ વાર્ષિક ₹૨૮.૮૨ લાખ રહ્યું છે. આ વર્ષે હાઈએસ્ટ પેકેજ ₹૮૧.૬૦ લાખ અને મિનિમમ પેકેજ ₹૧૨ લાખ નોંધાયું છે, જે ગત વર્ષની સરખામણીએ સારો વધારો દર્શાવે છે.
ઈન્ટરનેશનલ (વિદેશ): વિદેશી પ્લેસમેન્ટ માટે મિનિમમ $૪૦,૦૧૬, મેક્સિમમ $૬૭,૫૦૦ અને એવરેજ પેકેજ $૫૫,૨૨૭ યુએસ ડૉલર સુધીનું રહ્યું છે.
કન્સલ્ટિંગ ક્ષેત્રે સૌથી વધુ તકો અને સ્ટાર્ટઅપ ટ્રેન્ડ
કંપનીઓની પસંદગીની વાત કરીએ તો, સૌથી વધુ ૧૫૫ વિદ્યાર્થીઓની પસંદગી કન્સલ્ટિંગ કંપનીઓમાં થઈ છે. આ ઉપરાંત બેન્કિંગ અને ફાઇનાન્સ સેક્ટરમાં ૮૧, આઈટીમાં ૩૩ અને ફાર્મા-હેલ્થકેર ક્ષેત્રે ૧૩ વિદ્યાર્થીઓને નોકરી મળી છે. બીજી તરફ, જોબ મેળવવાના બદલે પોતાનો બિઝનેસ (એન્ટરપ્રિન્યોરશિપ) શરૂ કરવા તરફ વિદ્યાર્થીઓનો ઝુકાવ ખૂબ ઓછો જોવા મળ્યો છે અને માત્ર ૨ વિદ્યાર્થીઓએ જ IIM-Aની ફેલોશિપ હેઠળ પોતાનું વેન્ચર પસંદ કર્યું છે.
IIM અમદાવાદનો આ પ્લેસમેન્ટ રિપોર્ટ સાબિત કરે છે કે ભારતની પ્રીમિયમ સંસ્થાઓના ગ્રેજ્યુએટ્સ માટે દેશ-વિદેશમાં કોર્પોરેટ જગત દ્વારા ભલે લાખો-કરોડોના પેકેજોની ઓફરો અપાતી હોય, પરંતુ વૈશ્વિક સ્તરે પ્લેસમેન્ટ મેળવનારાઓની સંખ્યા હજુ પણ ખૂબ જ મર્યાદિત દાયરામાં simિત છે. વ્યવસાયિક જગતમાં કન્સલ્ટિંગ અને બેંકિંગ સેક્ટરનું વર્ચસ્વ આજે પણ અકબંધ રહ્યું છે.
