કોકરોચ જનતા પાર્ટીનું ગ્રામીણ શિક્ષણ સુધારવા 15 ઓગસ્ટથી દેશભરમાં રાષ્ટ્રવ્યાપી અભિયાન
80મા સ્વતંત્રતા દિવસે એક નવી ક્રાંતિની શરૂઆત! કોકરોચ જનતા પાર્ટી (CJP)એ દેશની ગ્રામીણ સરકારી શાળાઓની કાયાપલટ માટે કમર કસી છે. CJPના સ્થાપક અભિજીત દીપકેએ જાહેરાત કરી છે કે 15 ઓગસ્ટથી રાષ્ટ્રવ્યાપી અભિયાન શરૂ થશે, જેનો હેતુ વાલીઓ, સરપંચો અને યુવાઓને એક મંચ પર લાવીને ગામડાની શાળાઓને મૂળભૂત સુવિધાઓથી સજ્જ કરવાનો છે. આ વખતે નારો છે – “સંસદ નહીં, પહેલા શાળા”. અભિયાનની શરૂઆત મહારાષ્ટ્રના હિંગોળીથી થશે અને CJP હવે સીધી ચૂંટણીની જગ્યાએ ‘યુવા આંદોલન’ તરીકે કામ કરશે.
CJPએ આ અભિયાન માટે બે મોટા પગલા જાહેર કર્યા છે.
સરપંચ ચેલેન્જ: દેશભરના સરપંચોને પોતાના ગામની સરકારી શાળાની સ્થિતિ સુધારવા માટે ખુલ્લો પડકાર આપવામાં આવ્યો છે. જે પણ સરપંચ શાળામાં પાણી, શૌચાલય, વીજળી જેવી સુવિધાઓ ઊભી કરશે, CJP તેના કામની ‘પહેલા અને પછી’ની તસવીરો સોશિયલ મીડિયા પર શેર કરીને તેને જાહેરમાં ક્રેડિટ આપશે. દીપકેનું માનવું છે કે આનાથી સ્પર્ધાની ભાવના જાગશે અને અન્ય સરપંચો પણ પ્રેરિત થશે. તેઓ પોતે 15 ઓગસ્ટે પોતાના ગામ હિંગોળીથી આ શરૂઆત કરશે.
આ પણ વાંચો: લદાખની હિમશીલાઓ બની કલાકૃતિ!
વાલીઓનું સોશિયલ ઓડિટ: CJPએ વાલીઓને અપીલ કરી છે કે તેઓ પોતાના બાળકોની શાળાની મુલાકાત લે અને મિડ-ડે મીલ, સ્વચ્છ પાણી, ચાલુ શૌચાલય અને વીજળીની તપાસ કરે. જો સુવિધાઓ ન હોય તો તેનો વીડિયો બનાવીને પુરાવા સાથે CJPને મોકલવાના રહેશે. આ માટે CJP ટૂંક સમયમાં એક ખાસ ફોર્મ પણ જાહેર કરશે જેને ડાઉનલોડ કરીને વિગતો ભરી શકાશે. ફોર્મ અને વીડિયો contact@cockroachjantaparty.org પર મોકલી શકાશે.
અભિજીત દીપકેએ વીડિયો દ્વારા સવાલ ઉઠાવ્યો કે, “80 વર્ષમાં અમે નવું સંસદ ભવન અને PM આવાસ બનાવ્યું, પણ ગામડાઓની શાળાઓ કેમ ન સુધરી? ખેડૂતો-મજૂરોના બાળકોને આજે પણ પાણી-શૌચાલય વગર કિલોમીટર ચાલીને જવું પડે છે.” ઉલ્લેખનીય છે કે CJPએ તાજેતરમાં જંતર-મંતર પર 36 દિવસ સુધી સ્પર્ધાત્મક પરીક્ષાની ગેરરીતિ વિરુદ્ધ આંદોલન કર્યું હતું. હવે પક્ષે નિર્ણય લીધો છે કે તેઓ યુવા આંદોલન તરીકે જનહિતના મુદ્દાઓ પર કામ કરશે.
