હત્યાના પ્રયાસ, મારામારી, દારૂ સહિતના ૨૩ ગુનાઓ કરનારી કુખ્યાત ઇમલા ગેંગના આઠ શખસો કાયદાના સકંજામાં: એકસાથે બે-બે ગેંગને પાંજરે પુરતી રાજકોટ રૂરલ પોલીસ
રાજકોટ સહિત સૌરાષ્ટ્રભરમાં ચોરી, ઘરફોડી સહિતના ૪૭ ગુનાઓ આચરીને છેલ્લા દસ વર્ષથી ઉત્પાત મચાવતી ગોંડલની કુખ્યાત કાળિયો ગેંગ તેમજ ખૂની હુમલા, મારામારી, આર્મ્સ એક્ટ, પ્રોહિબિશન સહિતના ૨૩ ગુનાઓ આચરનારી બીજી ગોંડલની જ ઈમલા ગેંગની સામે રાજકોટ રૂરલ પોલીસે ગુજસીટોક હેઠળ ગુનો નોંધી જેલના સળિયા પાછળ ધકેલી છે. ગોંડલની બે-બે ગેંગ સામે ગુજસીટોક થતાં આવી અન્ય સંગઠિત ગુનાખોરી આચરતી ગેંગોમાં પણ ફફડાટ ફેલાયો છે.
ગોંડલના વાસાવડ ગામના વતની અને ગોંડલમાં આશાપુરા ચોકડી પાસે નદી નજીક રહેતા રણજીત ઉર્ફે રાહુલ ઉર્ફે કરો ઉર્ફે કાળિયો ધીરૂભાઈ સોલંકી ચારોલિયાએ ત્રણ ભાઈઓ વિક્રમ ઉર્ફે વિકુ ઉર્ફે વિજય, દેવચંદ, નારણ ઉર્ફે નરેશ તેમજ અન્ય સાગરિતો શિવરાજગઢના જીતેશ ઉર્ફે કટ્ટી ઉર્ફે જીતો નવલભાઈ ઉર્ફે મુનીભાઈ વાઘેલા, ઈનેશ ઉર્ફે યુનુસ ઉર્ફે ડીડી નવલભાઈ, પ્રકાશ ઉર્ફે પકો સવજી ઉર્ફે સવાભાઈ વાઘેલા, સાગર, જેતપુરના ગરનાળાના અશોક ઉર્ફે બાવભાઈ ચારોલિયા તેમજ વિજય ઉર્ફે વિજુ ઉર્ફે વિજલો અમરશી ચારોલા નામના ૯ શખસોની ગેંગ બનાવી હતી અને મિલકત તથા શરીર સંબંધી ગુનાઓ આચરતા હતા. કાળિયો ગેંગ તરીકે કુખ્યાત બની હતી. કાળિયો ગેંગ દ્વારા રાજકોટ શહેર, ગ્રામ્ય, અમરેલી, જૂનાગઢ, ગીર સોમનાથ, જામનગર, સુરેન્દ્રનગર, ભાવનગર તથા બોટાદ જિલ્લામાં અલગ-અલગ સ્થળે બંધ મિલકતોને નિશાન બનાવીને ચોરી કરતા હતા. આ ઉપરાંત મારામારી, ખૂન સહિતના મળી ગેંગ સામે ૪૭ ગુનાઓ નોંધાઈ ચૂક્યા છે જેમાં કાળિયા સામે ૨૯, વિક્રમ ઉર્ફે વિકુ ૩૦, દેવચંદ સામે ૯, નારણ ઉર્ફે નરેશ સામે ૬, જીતેશ સામે ૧૨, ઈનેશ ઉર્ફે યુનુસ ઉર્ફે ડીડી ૪, પ્રકાશ ઉર્ફે પકો સામે ૧૨, સાગર સામે ૫, વિજય ઉર્ફે વિજુ સામે ૧૯ ગુનાઓ નોંધાયેલા છે. રાજકોટ રૂરલ એલસીબીની ટીમ દ્વારા આ ગેંગ સામે ગુજસીટોક લગાવી સુત્રધાર રાહુલ ઉર્ફે કાળિયો સહિત છની ધરપકડ કરાઈ છે. વિજય ઉર્ફે વિજુ જેલમાં હોવાથી તેનો કબજો મેળવવા અને અન્ય બે શખસો ઈનેશ ઉર્ફ યુનુસ તથા વિક્રમ ઉર્ફે વિકુની શોધખોળ આદરી છે.
ગોંડલની અન્ય એક આઠ શખસોની ઈમલા ગેંગને પણ ગુજસીટોક હેઠળ કાયદાનો ગાળિયો નખાયો છે. ઈમરાન ઉર્ફે ઈમલો હસનભાઈ ઉર્ફે જમાલભાઈ કટારિયા (રહે.ચિશ્તીયા મંદિર પાસે, વોરા કોટડા રોડ) તેમજ તેના ભાઈ ઈરફાન ઉર્ફે ઈકુ અન્યો હુશેન ઉર્ફે ભોલિયો દિલાવર મકરાણી, શકીલ હસન ઉર્ફે જમાલભાઈ કટારિયા, હસન ઈસ્માઈલભાઈ, સરફરાજ ઉર્ફે નોડી હુશેન શેખ, નવાજ ઉર્ફે બાંબુટ દિલાવર પઠાણ, શાહરૂખ ઈબ્રાહીમ માંડલિયા મળી આઠ શખસો સામે ગુજસીટોક લગાવાઈ છે. ઈરફાન ઉર્ફે ઈકુ સામે ૧૭ ગુના, ઈમરાન ઉર્ફે ઈમલો સામે ૨૦ ગુના, હુશેન ઉર્ફે ભોલિયો સામે ૯, શકીલ સામે બે, હસન સામે ત્રણ, સરફરાજ સામે ૨, નવાજ ઉર્ફે બાંબુટ સામે ૧, શાહરૂખ સામે ૧ ગુનો નોંધાયેલો છે. ખૂનની કોશિષ, મારામારી, આર્મ્સ એક્ટ, પ્રોહિબિશન સહિતના ૨૩ ગુનાઓ આચરનારી ઈમલો ગેંગ સામે પણ ગુજસીટોક લગાવી છ શખસોને પકડી લેવાયા છે. થોડા દિવસ પૂર્વે જ સુલતાનપુરમાં થાર કાર સાથે જઈ ચડી મારામારી કરાઈ હતી. ગોંડલની ઘરફોડ કાળિયો ગેંગ તેમજ હત્યાના પ્રયાસ સહિતના ગુનાઓ આચરનારી ઈમલા ગેંગ સામે રેન્જ આઈ.જી. નિર્લિપ્ત રાય તથા એસપી વિજયસિંહ ગુર્જરના માર્ગદર્શન હેઠળ એલસીબી પીઆઈ વી.વી. ઓડેદરા તથા ટીમે ગુજસીટોક હેઠળ કાર્યવાહી કરી છે. ગોંડલ ડીવાયએસપી કે.જી. ઝાલા તથા જસદણ ડીવાયએસપી નવીન ચક્રવર્તીની રાહબરી હેઠળ બન્ને ગેંગ સામે કાર્યવાહી તપાસ ચલાવાઈ રહી છે.
