હું પત્રકાર છું… કહી ગોંડલમાં મજૂર પાસેથી 10 હજારનો તોડ કર્યો: પોલીસે આરોપીની ધરપકડ કરી કાયદાનું ભાન કરાવ્યું
રાજકોટ શહેર-જિલ્લામાં બોગસ, તોડબાજ, હપ્તાબાજ પત્રકારોનો રાફડો ફાટી નીકળ્યો હોય તે પ્રકારે એક બાદ એક ફરિયાદ નોંધાઈ રહ્યું છે. ડૉક્ટરને બ્લેકમેઈલ કરી 25 લાખની ખંડણી માંગવાનો આઠ પત્રકાર સહિત 12 લોકો સામે ગુનો નોંધાયાનું હજુ તાજુ જ છે ત્યાં હવે ગોંડલમાં `હું પત્રકાર છું’ કહી મજૂર પાસેથી 10,000નો તોડ કરી લેવામાં આવતાં પોલીસે આરોપીની ધરપકડ કરી કાયદાનું ભાન કરાવ્યું હતું.
આ અંગે ગોંડલના ભગવતપરા ગેઈટવાળી શેરીમાં રહેતા અને મજૂરીકામ કરતા રાહુલ કિશોરભાઈ ચૌહાણે ગોંડલ સિટી બી-ડિવિઝન પોલીસ મથકમાં નોંધાવેલી ફરિયાદમાં જણાવ્યું કે ગત 20 જાન્યુઆરીએ રાત્રે દસેક વાગ્યે તેના મિત્ર ધર્મેશ ચંદુભાઈ પરમાર માર્કેટિંગ યાર્ડમાં બેઠા હતા ત્યારે પોલીસ ત્યાં આવી પહોંચી હતી. ધર્મેશ દારૂ પીધો હોવાથી બન્નેને પોલીસ મથકે લઈ જવાયા હતા. રાહુલે દારૂ પીધો ન હોવાથી તેના સામે ગુનો દાખલ ન્હોતો કર્યો જ્યારે ધર્મેશ સામે ગુનો દાખલ કરી લોકઅપમાં ધકેલી દેવાયો હતો.
આ વેળાએ ધવલ ઉર્ફે ડી.કે.જેન્તીભાઈ રાણપરિયા પોલીસ મથકના કમ્પાઉન્ડમાં જ હાજર હતો તેણે રાહુલ પાસે આવીને પોતાને પત્રકાર ગણાવ્યો હતો અને વાતચીત કરી હતી. ત્યારબાદ કહ્યું હતું કે તે પોતે પત્રકાર છે સાથે સાથે તેના મિત્રો સોશિયલ મીડિયામાં પત્રકાર છે તેમને સવારે છાપામાં તેમજ સોશિયલ મીડિયામાં તારી વિગત આપી બન્ને મિત્રોને બદનામ કરી નાખીશ તેવી ધમકી આપી હતી. જો રૂપિયાનો વહીવટ કરશે તો સોશિયલ મીડિયામાં નહીં આપે અને પોલીસને ભલામણ કરી મિત્રશ્રે પણ જામીન ઉપર છોડાવી દેશે તેમ કહી દસ હજાર રૂપિયા ગૂગલ-પે મારફતે લઈ લીધા હતા.
આ પણ વાંચો: એ નાનીયા ઉભો રહે, હું આવું છું…! રાજકોટમાં પુત્રની વિદાય માતા સહન ન કરી શક્યા, અંતિમ યાત્રા સમયે જ બેભાન થયા બાદ મોત
જો કે પોલીસ દ્વારા ધર્મેશ પરમારને જામીન ન આપતાં રાહુલે ધવલ ઉર્ફે ડી.કે. કે જે પોતાને પત્રકાર ગણાવે છે તેની પાસેથી પૈસા માંગતા પરત આપવાની જગ્યાએ એવી ધમકી આપી હતી કે પૈસા માંગ્યા તો ઉપર મોટા પોલીસ અધિકારીઓને જાણ કરી તને પણ ફિટ કરાવી દઈશ સાથે સાથે જાનથી મારી નાખવાની ધમકી આપતાં પોલીસ ફરિયાદ નોંધાવી હતી.
