રાજકોટમાં લગ્ન માટે 180, અન્ય પ્રસંગ માટે 60 દિવસ પહેલાં બુક થશે કોમ્યુનિટી હોલ: ઓનલાઈન-ઓફલાઈન બુકિંગની સુવિધા ઉપલબ્ધ
રાજકોટ મહાપાલિકાના 2026-27ના સ્ટેન્ડિંગ કમિટી દ્વારા મંજૂર થયેલા બજેટ અંતર્ગત કોમ્યુનિટી હોલની બુકિંગ વ્યવસ્થામાં ફેરફાર કરી તેનો અમલ શરૂ કરવામાં આવ્યો છે. નવા નિયમ મુજબ હવે લગ્ન પ્રસંગ માટે 180 દિવસ અગાઉ અને સગાઈ અથવા અન્ય પ્રસંગો માટે 60 દિવસ અગાઉ કોમ્યુનિટી હોલ બુક કરી શકાશે.
એસ્ટેટ શાખાના જણાવ્યા મુજબ, હોલ બુકિંગ વખતે અરજદારે ડિપોઝિટ અને ભાડાની રકમ એકસાથે ભરવાની રહેશે. આથી બુકિંગ પ્રક્રિયામાં પારદર્શિતા આવશે અને બિનજરૂરી બુકિંગમાં ઘટાડો થશે. હોલનું બુકિંગ મહાપાલિકાની સત્તાવાર વેબસાઈટ પર ઓનલાઈન કરી શકાય છે, જ્યારે ઓફલાઈન બુકિંગ માટે અરજદારે એસ્ટેટ વિભાગમાં જઈને ફોર્મ ભરવું પડશે.
વધુમાં, હોલ બુકિંગની ઉપલબ્ધતા દરરોજ સવારે 11 વાગ્યાથી નવી તારીખો સાથે જાહેર કરવામાં આવશે. ઉપલબ્ધતા અનુસાર વધુ દિવસો માટે પણ હોલ બુક કરી શકાશે. હોલના ભાડા 2100 રૂપિયાથી 35100 રૂપિયા સુધી અને ડિપોઝિટ 4000થી 50000 રૂપિયા સુધી નક્કી કરવામાં આવી છે. હાલ મહાપાલિકાના 19 કોમ્યુનિટી હોલમાં કુલ 29 યુનિટ કાર્યરત છે.
