નિવૃત્ત શિક્ષકને ‘હનીટ્રેપ’નો શિકાર બનાવનાર 3 પકડાયા, રાજકોટની હોટેલમાં લઇ જઇ યુવતીએ પરાણે શરીર સંબંધ બંધાવ્યો, વિડીયો ઉતારી 12 લાખ પડાવ્યા
બોટાદમાં આવેલી સ્કૂલમાં શિક્ષક તરીકે ફરજ બજાવી નિવૃત્ત થયેલા વૃદ્ધને ‘હનીટ્રેપ’માં ફસાવી 12 લાખ રૂપિયા પડાવી લેનાર 3 લોકોને ક્રાઈમ બ્રાન્ચે દબોચી લઈ ગુનાનો ભેદ ઉકેલી નાખ્યો હતો. સ્કૂલના જ કાર્યક્રમમાં ભેગા થયા બાદ આ સંપૂર્ણ ‘ખેલ’ શરૂ થયો હતો અને વૃદ્ધને બ્લેકમેઈલિંગ કરી પૈસા માંગવામાં આવતાં આખરે કંટાળી જઈને તેમણે પોલીસ ફરિયાદ નોંધાવી હતી.
આ અંગે 59 વર્ષીય ફરિયાદીએ એ-ડિવિઝન પોલીસ મથકમાં નોંધાવેલી ફરિયાદમાં જણાવ્યું કે સ્કૂલના જ કાર્યક્રમમાં પાયલ ભાવિનભાઈ પટેલ નામની યુવતીનો પરિચય કાર્યક્રમના આયોજક થકી થયો હતો. પાયલ જમીન-મકાનનું કામકાજ કરતી હોય ફરિયાદીને પણ જમીન લેવાની હોય તેમણે પાયલને વાત કરી હતી. આ પછી પાયલે રાજકોટમાં જમીન જોવા જવાનું કહી વૃદ્ધને અમદાવાદ બોલાવ્યા હતા. અહીંથી વૃદ્ધની ગાડીમાં પાયલ અને તેની સાથે 1 યુવતી સહિત 3 લોકો બસ સ્ટેન્ડ પાછળ આવેલી એલેક્સા હોટેલમાં ઉતર્યા હતા.
રૂમમાં ગયા બાદ પાયલ પોતે જમીન વેચનાર પાર્ટીને બોલાવવા જાય છે તેમ કહી બહાર નીકળી ગઈ હતી અને થોડી જ વારમાં રૂમમાં એક અન્ય યુવતી આવી હતી. આ સમયે પાયલ અને વૃદ્ધ સાથે આવનારી યુવતી તેમજ બહારથી આવેલી યુવતીએ કપડાં કાઢી વૃદ્ધ સાથે બળજબરીથી શરીર સંબંધ બાંધી ફોટા પાડી લીધા હતા. આ પછી દુષ્કર્મનો કેસ કરવાની ધમકી આપવાનું શરૂ કરતાં વૃદ્ધ ગભરાઈ ગયા હતા. ત્યારબાદ પાયલ પણ આવી ગઈ હતી અને તે વૃદ્ધને ત્યાંથી બહાર લઈ ગઈ હતી. આ પછી પૈસા માંગવાનો ખેલ શરૂ કરી શરૂઆતમાં 80 લાખ રૂપિયા માંગ્યા હતા. વાતચીતના અંતે 15 લાખ રૂપિયા સુધી તમામ આવી ગયા હતા જેમાંથી વૃદ્ધ પાસે 12 લાખ રૂપિયા જ પડ્યા હોય તેમણે પાયલને આરટીજીએસ મારફતે મોકલી આપ્યા હતા.
આ પછી પણ વૃદ્ધ પાસે પૈસાની માંગણી કર્યે રાખતાં આખરે તેમણે મિત્રોની મદદથી એ-ડિવિઝન પોલીસ મથકમાં ફરિયાદ નોંધાવી હતી. ફરિયાદ નોંધાતાં જ ક્રાઈમ બ્રાન્ચે પાયલ ભાવિનભાઈ પટેલ (રહે. ગાંધીનગર), તેની સહેલી તેજલ દીપકભાઈ ટીંડાણી (રહે. મોરબી રોડ, રાજકોટ) અને તેના મિત્ર નિલેશ મૈયાભાઈ જુંજા (રહે. પદ્યધરી)ને દબોચી લીધો. તપાસમાં ખુલ્યા પ્રમાણે તેજલ રાજકોટમાં જ રહીને કેટરિંગનું કામ કરતી હોવાનું અને નિલેશ સાથે પરિચયમાં હોવાનું ખુલ્યું હતું. જ્યારે અંજલિ સોલંકી નામની યુવતી હજુ ફરાર હોય તેને પકડવા દોડધામ ચાલી રહી છે.
પાયલે અંકલેશ્વરમાં જ હનીટ્રેપ કરી પૈસા પડાવ્યા’તા
પોલીસ તપાસમાં ખુલ્યા પ્રમાણે આ ગુનાની મુખ્ય સૂત્રધાર પાયલ પટેલે અગાઉ 2025માં અંકલેશ્વરમાં આ જ મોડેસ ઓપરેન્ડીથી હનીટ્રેપ કરી પૈસા પડાવ્યા હોવાનું તપાસમાં સામે આવ્યું હતું. જ્યારે તેજલ વિરુદ્ધ પણ 2016માં યુનિવર્સિટી પોલીસ મથકમાં ગુનો દાખલ થયો હતો.
