ઓપરેશન મૂલ હંટ: રાજકોટ-ગોંડલ ગેંગનું સાયબર ફ્રોડ 1500 કરોડે પહોંચ્યું: તેલંગણા કનેક્શનનો ઘટસ્ફોટ, સુત્રધાર શખસ સહિત વધુ 3ની ધરપકડ
ઓપરેશન મૂલ હંટ થકી રાજકોટ રૂરલ પોલીસને મળેલી ટીપ્સ આધારે દસ દિવસ પૂર્વે રાજકોટ અને ગોંડલની ગેંગને પકડીને 400 કરોડના ઓનલાઈન ફ્રોડના કરેલા પર્દાફાશમાં ચાલી રહેલી ઉંડાણભરી તપાસમાં ફ્રોડનો આંક 1500 કરોડે પહોંચ્યો છે. પોલીસે રેકેટના મૂળ તાર તેલંગાણામાં નીકળ્યા હોવાથી સૂત્રધાર તેલંગાણાના જગતિયાલના આદીલુદ્દીન મહંમદ મુનીરૂદ્દીન મહંમદ તેમજ અન્ય બે શખ્સો રાજકોટના મિહિર રામજીભાઈ રંગાણી તથા હિરેન અશ્વિનભાઈ લીંબાસિયાની ધરપકડ કરી છે. તપાસમાં મિહિર અને મનિષ હસ્તકના તમામ બેન્ક એકાઉન્ટ્સમાં નાણાંની હેરફેર હિરેન લીંબાસિયાની વચેટિયાની ભૂમિકા રહી હતી.
ગોંડલ માર્કેટિંગ યાર્ડમાં જ્યોત ટ્રેડિંગ કંપનીના બેન્ક એકાઉન્ટમાં કરોડોના વ્યવહારો થયાની મૂલ હંટ ઓપરેશન હેઠળ સાયબર ક્રાઈમ સેલ ગાંધીનગર તરફથી રાજકોટ રૂરલ પોલીસને માહિતી અપાઈ હતી જેથી રૂરલ પોલીસ દ્વારા ગોંડલના રેવાણીનગરમાં રહેતા જય મનસુખભાઈ નાદપરા (ઉ.વ. 25)ની ધરપકડ કરાઈ હતી. જય કમિશન નામે અલગ-અલગ એકાઉન્ટ્સમાં લાખો-કરોડોના ટ્રાન્ઝેક્શન કર્યા હતા. તપાસમાં માર્કેટ યાર્ડના કમિશન પેઢીઓના બેન્ડ એકાઉન્ટ્સ ખોલાવીને આર્થિક મોટું રેકેટ ચલાવાતું હતું.
આરોપી મનિષ કામાણી દ્વારા ભવ્યા તેમજ સુરેશ્વર આશરા એન્ટરપ્રાઈઝમાં ચાર ખાતામાં 539 કરોડ, જય નાદપરાની ઓમ ટ્રેડિંગ, જ્યોત એન્ટરપ્રાઈઝ તથા અન્ય પેઢીમાં બે ખાતામાં 383 કરોડ, મિહિર રંગાણીની લોરેલ એગ્રી એક્સપોર્ટ તથા અન્યમાં મળી બે એકાઉન્ટમાં 87 કરોડ, લાલો ઉર્ફે યાર્નિક ઝાલાવડિયાની મા આશાપુરા એન્ટરપ્રાઈઝ, એસ.બી. એન્ટરપ્રાઈઝમાં 493 કરોડ, તેલંગાણાના મોહંમદ આદીલુદ્દીન અલમુનીર, અલકાઝિલ તથા અન્ય પાંચમાં કરોડો મળી 1500 કરોડ જેવી રકમની હેરેફેર/વીડ્રો થયા હતા.
સૂત્રધાર તેલંગાણાના શખ્સ સહિત વધુ ત્રણની ધરપકડ કરતી રાજકોટ રૂરલ પોલીસ: ઓપરેશન મૂલ હંટ દ્વારા ખૂલ્યું હતું કરોડોનું રેકેટ આ ઉપરાંત રૂપિત રૈયાણી, પ્રવિણસિંહ પરમાર, મયુરસિંહ વાઘેલા, મહેશસિંહ જાડેજા, હિરેન લીંબાસિયા દ્વારા નાણાકીય હેરફેર કરાઈ હોવાનું ખુલ્યું છે. રૂરલ પોલીસે વધુ ત્રણ આરોપી તેલંગાણાના જગતિયાલના ચોથાકુંટામાં રહેતા આદીલુદ્દીન મહંમદ મુનીરૂદ્દીન મહંમદ, રાજકોટમાં કુવાડવા રોડ જયગુરુદેવ વોર્ડ-1 શેરી નં. 2માં રહેતા મિહિર રામજીભાઈ રંગાણી તેમજ નાનામવા રોડ પર તિરૂપતિ પાર્કમાં રહેતા હિરેન અશ્વિનભાઈ લીંબાસિયાની ધરપકડ કરાઈ છે. અત્યાર સુધીમાં અગાઉ છ આરોપીની ધરપકડ થઈ હતી. વધુ ત્રણની ધરપકડ થતા આંક નવ પર પહોંચ્યો છે. તપાસમાં હજુ વધુ ધરપકડોની સંભાવના છે.
15 બેન્ક એકાઉન્ટ્સનો ઉપયોગ, 180 જેટલી ઓનલાઈન ફરિયાદ આવી
એપીએમસીના જીન્સની લે-વેચ કમિશન પેઢીઓ ખોલીને ચાલતા કરોડોની લેવડ-દેવડના રેકેટમાં 15 બેન્ક એકાઉન્ટ્સનો ઉપયોગ થયો હતો જેમાં ફ્રોડ સંદર્ભે સાયબર ક્રાઈમ પોર્ટલ 1930 પર 180 ફરિયાદો થઈ હતી, જે પૈકી 21 ફરિયાદો ગુજરાતની અને 159 ફરિયાદો અન્ય રાજ્યોની હતી. ગુજરાતની 21 ફરિયાદોમાં 2,94,14,289 રૂપિયા તેમજ અન્ય રાજ્યોની 159 ફરિયાદોમાં 20,20,52,322 રૂપિયાની સાયબર પોર્ટલ પર રિપોર્ટિંગ થયેલા 1500 કરોડના ટ્રાન્ઝેક્શનોમાં 23.14 કરોડનો કમિશન નામે સાયબર ફ્રોડ થયાની માહિતી રાજકોટ રૂરલ પોલીસ દ્વારા અપાઈ છે.
