જૂનાગઢમાં ત્રણ ગુનામાં વોન્ટેડ વિવાદિત કીર્તિ પટેલને પોલીસે રાજસ્થાનમાંથી પકડી: મૃગીકુંડમાં સ્નાન વિવાદથી ફસાઈ

જુનાગઢ મહાશિવરાત્રીના મેળામાં સાધુ વેશ ધારણ કરીને મૃગીકુંડમાં સ્નાન કર્યા બાદ વધુ એક વખત વિવાદના ચકરાવે ચડેલી વિવાદની પર્યાય જેવી કીર્તિ પટેલ સામે ચાર જ દિવસમાં જૂનાગઢમાં પોલીસ સાથે ગેરવર્તન, સાધુ સંતોની લાગણી દુભાવવી, તેમજ યુ ટ્યુબરને ધમકી આપી ખંડણી માંગવાના આરોપસર નોંધાયેલા ત્રણ ગુનાઓમાં વોન્ટેડ વિવાદિત કીર્તિ પટેલને રાજસ્થાનમાંથી પોલીસે પકડી પડી જુનાગઢ લવાઈ છે. અલગ અલગ ત્રણેય ગુનાઓમાં કાયદાકીય કાર્યવાહી પ્રક્રિયા સાથે કીર્તિની ધરપકડ કરશે.

જૂનાગઢ મહાશિવરાત્રીના ગત રવિવારે (15મી ફેબ્રુઆરી) રાતે ગિરનાર મેળામાં મૃગીકુંડમાં ભગવા કપડા ધારણ કરી કીર્તિ પટેલે ડૂબકી લગાવતા પોલીસ દ્વારા તેને મૃગીકુંડમાંથી બહાર કાઢવામાં આવી હતી. ત્યારે કીર્તિ પટેલે પોલીસ સાથે શાબ્દિક ટપાટપી કરી હતી સ્નાન અને પોલીસ સાથે ઘર્ષણ કર્યાના બન્ને વીડિયો વાયરલ થયા હતા. તા.17ના રોજ કીર્તિ સામે પી.આઈ. કે.જે.મોડ દ્વારા ફરિયાદ નોંધાવાઈ હતી, ત્યારબાદ બીજા દિવસે ભાલકાતીર્થના નિરાળી ખોડીયાર આશ્રમના મહંત બજરંગદાસ ઉદાશીનબાપુએ , મૃગીકુંડમાં ફક્ત સાધુ સંતો જ સ્નાન કરી શકે છે, ત્યારે કીર્તિ પટેલે ભગવા કપડા પહેરી આ રીતે મૃગીકુંડમાં સ્નાન કરતા સાધુ સંતોની આસ્થાને ઠેસ પહોંચી હોવાના આરોપ સાથે જુનાગઢ ભવનાથ પોલીસસ્ટેશને ફરિયાદ નોંધાવી હતી. આ બન્ને ગુનામાં કીર્તિને જુનાગઢ પોલીસ શોધી રહી હતી.

એ દરમિયાન તા.21ને શનિવારે ત્રીજી ફરિયાદ ગઈકાલે જુનાગઢના અબજલ સીડા નામના યુ-ટ્યૂબરે નોંધાવી હતી. અબઝલે મૃગીકુંડ સ્નાન વિવાદમાં સાધુ-સંતોના સમર્થનમાં વીડિયો બનાવ્યો હતો અને તેને સોશિયલ મીડિયા પર વાયરલ કર્યો હતો. કીર્તિ પટેલ અને તેની મિત્ર સહિત 5 લોકોની ટોળકી આ વીડિયોથી ઉશ્કેરાયેલી ગઈ હતી અને આ યુ-ટ્યુબર સોશિયલ મીડિયાના માધ્યમથી આ વીડિયો હટાવવા દબાણ શરૂ કર્યું હતું. જેથી બે બે વખત ફિનાઈલ પીને આપઘાતનો પ્રયાસ કરતા સારવારમાં ખસેડાયો હતો.

આ પણ વાંચો:ઇલેક્શન મોડ? દેવામાં ડુબેલાઓને બચાવવા કર્ઝા મુક્તિ અભિયાન: 26મીએ રાજકોટમાં સંમેલન, શંકરસિંહની પાર્ટીએ બીડું ઉપાડ્યું

ફરિયાદમાં આરોપ મુજબ કીર્તિની મિત્ર દિવ્યા સાવલાણી, જશપાલસિંહ, સુરતના હનુ રાણા ચાવડા અને વિરમ ચોથા મેવાડાએ મળીને વીડિયો હટાવવાના બદલામાં 20 લાખ રૂપિયાની તોતિંગ ખંડણી માંગી હોવાના અને એટલું જ નહીં, જો માંગણી પૂરી ન થાય તો તેને ખોટા બળાત્કારના કેસમાં ફસાવી દેવાની અને જાનથી મારી નાખવાની પણ ધમકી આપી હતી પોલીસે ત્રીજી ફરિયાદ નોંધી હતી. ચાર દિવસમાં ત્રણ ગુનામાં વોન્ટેડ કીર્તિને ટેકનીકલ અને હ્યુમન સોર્સ મુજબ માહિતી મળતા રાજસ્થાનમાંથી પકડી પાડી જુનાગઢ લાવીને તપાસ હાથ ધરી છે.

કોઈના ચિઠ્ઠા ન ખુલે એ માટે ફરિયાદ, કીર્તિ પટેલની સહ આરોપી યુવતીનો આપઘાતનો પ્રયાસ

યુ -ટ્યુબર અબઝલે નોંધાવેલી ફરિયાદમાં કીર્તિ પટેલની સહ આરોપી દિવ્યાએ ફિનાઈલ પીને આપઘાતનો પ્રયાસ કર્યો છે. દિવ્યાએ એવા આક્ષેપો કર્યા છે કે પોતે અબઝ્લને જાણતી પણ નથી, અબઝલે કીર્તિ પટેલના વિવાદમાં ટીઆરપી વધે એટલે વીડિયો બનાવ્યો. કીર્તિ પટેલને અપશબ્દો કહ્યા હતા. કીર્તિ પટેલ મોટા સાધુ સંતો કે ઇન્દ્રભારતી બાપુના અંદર છુપાયેલા રહસ્યો ખોલવાની હતી જેથી તેને અટકાવવા આવું કાવતરું કરાયું છે. આક્ષેપોમાં સત્ય શું છે એ તો તપાસનો વિષય છે બાકી અન્ય એક મહંતે ઇન્દ્રભારથી બાપુ અને તેમના આશ્રમમાં અનૈતિક ચાલતું હોવાના એપસ્ટીન ફાઈલ જેવું હોવાના ગંભીર આક્ષેપો કરતા જુનાગઢ ભવનાથ ફરી ચર્ચાનો ગરમાવો બન્યા છે.