આજે ગુજરાત સરકારનું 2026-27નું બજેટ: કનુ દેસાઈ સતત 5મી વખત રજૂ કરશે, ચૂંટણીના લીધે કરવેરાનો નવો બોજ ન આવે તેવી શક્યતા
ગુજરાત સરકારનું વર્ષ 2026-27નું અંદાજપત્ર આજે વિધાનસભામાં રજૂ કરવામાં આવશે. વિધાનસભા ગૃહમાં બપોરે એક વાગ્યે નાણામંત્રી કનુ દેસાઈ આ બજેટ રજૂ કરશે. નવા બજેટમાં મહેસૂલ, શહેરી વિકાસ અને ટુરિઝમ વિભાગમાં નવી યોજનાઓ અને જોગવાઈઓ જાહેર કરવામાં આવે તેવું જાણકારોમાં ચર્ચા છે.
ગુજરાત સરકાર દ્વારા વર્ષ 2026-27નું બજેટ આવતીકાલે રજૂ થવા જઈ રહ્યું છે.આજે બપોરે ૧ વાગ્યે ગૃહ મળે ત્યારે સૌપ્રથમ એક કલાક પ્રશ્નોતરીની ચર્ચા થશે. ત્યારબાદ બપોરે એક કલાકથી નાણામંત્રી કનુભાઈ દેસાઈ વર્ષ 2026-27નું અંદાજપત્ર રજૂ કરશે. સૌ પ્રથમ નવી યોજનાઓ, નવી જાહેરાત અને નવી જોગવાઈઓ તેમજ વિભાગવાર જોગવાઈઓનું વાંચન કરશે. ત્યારબાદ નવા કરવેરા અને અન્ય આવકની જોગવાઈઓની જાહેરાત કરશે. અંદાજે બે કલાક સુધી અંદાજપત્રનું વાંચન કર્યા બાદ બપોરે 3 કલાકે નાણામંત્રી કનુ દેસાઈની અંદાજપત્ર પર પ્રેસ કોન્ફરન્સ યોજાશે. આ વર્ષે મહાનગરપાલિકાઓ અને જિલ્લા, તાલુકા પંચાયતોની ચૂંટણી આવતી હોવાથી આ અંદાજપત્રમાં નવા કરવેરા કે નવી ટેક્ષ લાદવામાં આવશે નહીં તેવી શક્યતા છે.
જ્યારે ગુજરાતમાં ટુરિઝમને પ્રોત્સાહન આપવા ટુરિઝમને લગતી નવી યોજનાઓ જાહેર કરાય તેવી પૂરી શક્યતા છે. આ ઉપરાંત રિન્યુએબલ એનર્જી અને ક્લાઇમેટ ચેન્જ પર વધુ ભાર મૂકાય તેવી શક્યતા છે.
ઉલ્લેખનીય છે કે ગત વર્ષે 3.25 લાખ કરોડના કદનું બજેટ રજૂ કરાયા બાદ આ વર્ષે તેમાં દસથી પંદર ટકાનો વધારો કરાય તેવી શક્યતા છે. બજેટની સાથે ગુજરાતનું સામાજિક આર્થિક સર્વેક્ષણ પણ રજૂ કરાશે.
