ઢોસા ખલાસ થઈ ગયા હોવાનું કહેતા ચાર શખસો ઉશ્કેરાયા તોડફોડ કરી તપેલા અને ડોયા વડે હુમલો કરતા દુકાનનો સંચાલક સહિત બે ઇજાગ્રસ્ત થયા
શહેરના રૈયા રોડ પર હનુમાન મઢી પાસે આવેલી ઢોસાની દુકાનમાં મોડી રાત્રે ખાણીપીણીની બાબતે થયેલી બોલાચાલીએ િંહસક સ્વરૂપ ધારણ કર્યું હતું. ઢોસાનો માલ પૂરો થઈ ગયો હોવાનું કહેતા ટૂર એન્ડ ટ્રાવેલ્સના ધંધાર્થી સહીતનાચાર શખસોએ ઉશ્કેરાઈને દુકાન સંચાલક અને તેમના સાળા પર તપેલા તથા ડોયા જેવા વાસણો વડે જીવલેણ હુમલો કર્યો હતો. આ અંગે ગાંધીગ્રામ પોલીસ મથકમાં ફરિયાદ નોંધાવવામાં આવી છે.
આ અંગેની વિગતો મુજબ, કૈલાશ પાર્કમાં રહેતા અને રૈયા રોડ પર ઢોસા કાફે ચલાવતા અબુબકર મોહમદ હનીફ (ઉ.વ. 45) એ મયંક ધર્મેન્દ્રભાઈ ખજૂરિયા (રહે. અલકાપુરી સોસાયટી શેરી નંબર 1), સુરેશ સાજન ભાઈ દુબે ( રહે. પરસાણા નગર શેરી નંબર 7) તેમજ બે અજાણ્યા શખસો સામે ફરિયાદ નોંધાવતા જણાવ્યું હતું કે, રાત્રે પોણા બાર વાગ્યાની આસપાસ અબુબકરભાઈ તેમના મિત્રની દુકાને ગયા હતા ત્યારે તેમના સાળા આરીફનો ફોન આવ્યો હતો કે ચાર વ્યક્તિઓ ઢોસા ખાવા માટે આવ્યા છે.
આરીફે ઢોસાનો માલ પૂરો થઈ ગયો હોવાનું કહેતા મયંક, સુરેશ અને તેમની સાથેના અન્ય બે શખસોએ બોલાચાલી શરૂ કરી હતી.
અબુબકરભાઈ તાત્કાલિક પોતાની દુકાને પહોંચ્યા અને મામલો થાળે પાડવાનો પ્રયાસ કર્યો હતો. જોકે, આરોપીઓ વધુ ઉશ્કેરાયા હતા અને ઝપાઝપી શરૂ કરી હતી. આરોપી સુરેશે અબુબકરભાઈને માથાના ભાગે ડોયા વડે ફટકો મારતા તેઓ લોહીલુહાણ થઈ ગયા હતા, જ્યારે મયંક નામના શખસે તપેલા વડે માર માર્યો હતો.
અન્ય બે શખસોએ દુકાનમાં રહેલી ખુરશીઓ અને વાસણોમાં તોડફોડ કરી નુકસાન પહોંચાડ્યું હતું. હુમલામાં ઈજાગ્રસ્ત થયેલા અબુબકરભાઈ અને તેમના સાળા આરીફને તાત્કાલિક રાજકોટની સિવિલ હોસ્પિટલ ખાતે સારવાર માટે ખસેડવામાં આવ્યા હતા. ઘટના બાદ આસપાસના લોકો એકઠા થઈ જતાં ચારેય હુમલાખોરો ત્યાંથી નાસી છૂટ્યા હતા.
ગાંધીગ્રામ પોલીસે આ મામલે મયંક અને સુરેશની ધરપકડ કરતાં તેઓએ કેફી પીણું પીધું હોવાનું માલુમ પડતાં અલગથી ગુનો નોંધાયો હતો.
