‘મારો વીડિયો કેમ ઉતર્યો’ કહી યુવક ઉપર ત્રિપૂટીનો હુમલોઃ મોબાઇલ-બાઇક પડાવી લીધા

શહેરમાં નજીવે બાબતે મારામારીની ઘટનાઓ સામે આવી છે. કોઠારીયા રોડ પર “મારો વીડિયો” કેમ ઉતર્યો તેમ કહીને યુવકને મારમારી ત્રણ શખસોએ મોબાઈલ અને બાઈક પડાવી લેતા મામલો પોલીસ મથકે પહોંચ્યો હતો તેવી જ રીતે સાધુ વાસવાણી રોડ ઉપર માતાને રીક્ષામાં નહીં બેસાડવાનું તેમ કહીને મિત્રએ રીક્ષા ચાલકને ફટકાર્યો, રૈયાધારમાં એકટીવા પાર્ક કરવા બાબતે પાડોશીએ દંપતીને ધોકા-પાઇપ ઝીંકયા હતા. રૈયાધારમાં જૂની અદાવતમાં યુવકોમાં હુમલો થયો હતો.

આ અંગેની વિગતો મુજબ, કોઠારીયા રોડ જયનગર મફતિયાપરમાં રહેતા અને મજૂરી કામ કરતા 25 વર્ષીય વનરાજ મોહનભાઈ અજાડિયાએ આજીડેમ પોલીસ મથકમાં આરોપી તરીકે જયપાલ, રાણો, અમિત ડાઢીનું નામ આપી ફરિયાદ નોંધાવતા જણાવ્યું હતું કે, શુક્રવારે સાંજે તે ઘરે હતો ત્યારે આરોપી જયપાલએ ફોન કરીને રણુજા મંદિર પાસે મળવા બોલાવ્યો હતો વનરાજ અહીં પહોંચતા જયપાલ તે મારો વીડિયો કેમ ઉતાર્યો તેમ કહીને ગાળો ભાંડી હતી. યુવકે કોઈ વિડીયો ન ઉતાર્યો હોવાનું કહેતા જ જયપાલ સાથે રહેલ રાણો અને અમિત ડાઢીએ મોબાઈલ આચકવાનો પ્રયાસ કર્યો હતો.યુવકે પ્રતિકાર કરતા આરોપીઓએ માર માર્યો હતો અને મોબાઈલ અને બાઈકની ચાવી પડાવી લીધી હતી.ત્યારબાદ આરોપીઓ જાનથી મારી નાખવાની ધમકી આપી હતી.

બીજા બનાવમાં, રૈયા ગામમાં રહેતો અને રિક્ષા ચલાવી પરિવારનું ગુજરાન ચલાવતા 21 વર્ષીય મહેશ ધારશીભાઈ માલાણીએ આરોપી તરીકે મિત્ર ઓમદીપિંસહ જાડેજા અને રાધે ઉર્ફે કયલોનું નામ આપી જણાવ્યું હતું કે, આરોપી ઓમદીપે પેટ્રોલના પૈસા આપવા માટેનું કહીને સાધુવાસવાણી રોડ પર આવેલી વચ્છરાજ હોટેલ બોલાવ્યો હતો. મહેશ અહીં જતાં જ ઓમદીપે તારે મારા મમ્મીનો ફોન આવે તોય રીક્ષામાં તેડવા મૂકવા નહી જવાનું કહીને ગાળો ભાડી મારમાર્યો હતો. ત્રીજા બનાવમાં રૈયાધાર મફતિયાપરામાં રહેતા મંજુબેન ચૌહાણ અને તેમના પતિ જેન્તીભાઇ ઉપર એક્ટિવા રાખવા બાબતે પાડોશી રમેશ અને પ્રફુલ નામના શખસે ઝઘડો કરીને દંપતીને માર મારવામાં આવ્યો હતો. ઇજાગ્રસ્ત હાલતમાં બંનેને સિવિલ હોસ્પિટલમાં સારવારમાં ખસેડવામાં આવ્યા હતા. મારમારીની અન્ય એક ઘટનામાં વીરડા વાજડી ગમે રહેતા 38 વર્ષીય મનસુખ દેવશીભાઈ સોંદરવા નામના યુવકને વિજય ભલ્લાભાઈ ચૌહાણ નામના શખસ બે વર્ષ પૂર્વે માથાકૂટમાં કેમ વચ્ચે છોડાવવા પડેલો તેમ કહી લોખડનો સળિયો છાતીના ભાગે મારી દીધો હતો. બનાવ અંગે યુનિવર્સિટી પોલીસે ગુનો નોંધી વધુ તપાસ હાથ ધરી છે.