રાજકોટમાં થર્ટી ફર્સ્ટે લઈને પોલીસનું જાહેરનામું: રાત્રે 11:55 વાગ્યાથી 12:30 સુધી ફટાકડા ફોડી શકાશે! તલવાર કે મોટા છરાથી કેક કાપવાની મનાઈ
આવતીકાલે બુધવારે આખા વિશ્વમાં 2025ના વર્ષને વિદાય અને 2026ના વર્ષને આવકારવા માટે જબરદસ્ત ઉજવણી થવાની છે ત્યારે રાજકોટ પણ થર્ટી ફર્સ્ટની ઉજવણીમાં મગ્ન બની જશે. જો કે ન્યુ યરને વેલકમ કરવામાં અમુક તત્ત્વો છાકટાં બની જતાં હોવાથી તેમને કાબૂમાં રાખવા પોલીસે પણ ધાર સજાવી લીધી છે.
આ ઉપરાંત આડેધડ ફટાકડા ફોડી પ્રદૂષણ ન ફેલાય તે માટે ફટાકડા ફોડવાનો સમય નિર્ધારિત કરતું પોલીસ કમિશનરનું જાહેરનામું પણ પ્રસિદ્ધ થયું છે જે પ્રમાણે થર્ટી ફર્સ્ટે રાત્રે 11ઃ55 વાગ્યાથી 12ઃ30 વાગ્યા સુધી જ ફટાકડા ફોડી શકાશે અને ત્યારબાદ ફટાકડા ફોડનાર સામે ગુનો દાખલ થશે તેવું જણાવાયું છે.
આ ઉપરાંત જાહેર રસ્તાઓ પર ફટાકડા ફોડવા ઉપર પ્રતિબંધ રહેશે. બેફામ બાઈક ચલાવનાર, બાઈકના સ્ટંટ કરનાર તેમજ ફોર-વ્હીલના બોનેટ ઉપર બેસવા-ઉભા રહેવા કે ડેકી ખોલીને બેસનારા સામે પણ ગુના દાખલ કરવામાં આવશે.
જાહેરમાં એકબીજા ઉપર પાણી ઉડાડવા કે પાણીની બોટલ ફેંકવા, તલવાર કે મોટા ચાકુથી કેક કાપવા, જોર-જોરથી મ્યુઝિક વગાડવા, પાનના ગલ્લે-ચાની લારીએ ચાર કરતા વધુ વ્યક્તિઓના ભેગા થવા, બાઈક તેમજ ફોર-વ્હીલરના તીવ્ર હોર્ન વગાડવા ઉપર પ્રતિબંધ ફરમાવાયો છે.
