પુતિન આજે ભારતમાં : 30 કલાક અને 130 લોકોની ટીમ, પુતિનની સુરક્ષા માટે દિલ્હી કિલ્લામાં ફેરવાયુ, રશિયન રાષ્ટ્રપતિનું ભોજન પણ રશિયાથી જ આવશે

રશિયાના રાષ્ટ્રપતિ વ્લાદિમીર પુતિન પોતાની બે દિવસની મુલાકાતે ગુરુવારે સાંજે ભારત આવી રહ્યા છે. આ મુલાકાત માટે દિલ્હીને કિલ્લામાં ફેરવી નાખવામાં આવ્યું છે. NSG કમાન્ડો, SWAT ટીમો, દિલ્હી પોલીસ, અર્ધલશ્કરી દળો અને રશિયન વિશેષ દળો સંયુક્ત રીતે બહુ-સ્તરીય સુરક્ષા રિંગ બનાવશે. ડ્રોન વિરોધી બંદૂકો, ઉડતા ડ્રોનથી દેખરેખ, હજારો CCTV કેમેરા અને ચહેરા ઓળખવાની સિસ્ટમ દરેક ક્ષણ પર નજર રાખી રહી છે.

ટ્રમ્પના ટેરિફ ધમપછાડા અને યુધ્ધના માહોલ વચ્ચે રશિયાના રાષ્ટ્રપતિ  પુતિન 23મા ભારત-રશિયા શિખર સંમેલનમાં ભાગ લેવા માટે આજે બે દિવસની યાત્રા પર  નવી દિલ્હી આવી રહ્યા છે. આ મુલાકાત દરમિયાન તેઓ વડાપ્રધાન નરેન્દ્ર મોદી સાથે શુક્રવારે આવતી કાલે  દ્વિપક્ષીય વાટાઘાટો કરશે. તેઓ રાષ્ટ્રપતિ દ્રૌપદી મુર્મુ સાથે પણ મુલાકાત કરશે. પુતિનની મુલાકાતથી બંને દેશો વચ્ચે વ્યૂહાત્મક, સંરક્ષણ, ઉર્જા અને વેપાર ક્ષેત્રોમાં નોંધપાત્ર પરિણામો મળવાની અપેક્ષા છે. આ સાંજે 6 વાગે એમનું દિલ્હીમાં આગમન થશે. એમનું ભવ્ય સ્વાગત થશે.  તેઓ વડાપ્રધાન સાથે રાત્રિ ભોજ લેશે.  બંને દેશો વચ્ચે અસૈન્ય પરમાણુ સહયોગ અંગે  એમઓયુ થઈ શકે. યુક્રેન યુધ્ધ શરૂ થયા બાદ પુતિનની આ પ્રથમ ભારત યાત્રા છે.  છેલ્લે તેઓ 2021 માં ભારત આવ્યા હતા.

ભારત રશિયામાં તેની રાજદ્વારી હાજરીનો વિસ્તાર કરી રહ્યું છે. કાઝાન અને યેકાટેરિનબર્ગમાં નવા કોન્સ્યુલેટ ખુલશે. આનો સીધો ફાયદો ભારતીય કંપનીઓ અને ત્યાં કામ કરતી કંપનીઓને થશે. મુલાકાત દરમિયાન સંરક્ષણ સહયોગ પણ એક મુખ્ય એજન્ડા રહેશે. Su-57 જેવા અદ્યતન પ્લેટફોર્મ સહિત અનેક મુદ્દાઓ પર ચર્ચા થવાની અપેક્ષા છે.

આ પણ વાંચો :મદીનાથી હૈદરાબાદ જતી ઇન્ડિગોની ફ્લાઇટને બોમ્બની ધમકી મળી : અમદાવાદ એરપોર્ટ પર ઇમર્જન્સી લેન્ડિંગ,પોલીસની ટીમ એરપોર્ટ પહોંચી

ભારતીય કામદારો માટે નવો માર્ગ

ભારત અને રશિયા વચ્ચે કુશળ અને અર્ધ-કુશળ કામદારો માટે ગતિશીલતા કરારનો મુસદ્દો તૈયાર થઈ ગયો છે. રશિયા હાલમાં મોટી સંખ્યામાં વિદેશી કામદારો શોધી રહ્યું છે, અને આ કરાર ભારતીયો માટે નવી તકો ખોલશે.

ઝડપથી વિકસતો આર્થિક સહયોગ

ભારત-રશિયા વેપારનું પ્રાથમિક ધ્યાન હવે બે મુદ્દાઓ પર છે: રશિયા સાથે ભારતની વધતી જતી વેપાર ખાધ ઘટાડવી અને લાંબા ગાળાની ઊર્જા અને ખાતર સુરક્ષા સુનિશ્ચિત કરવી. રશિયામાંથી ખાતરની આયાત ભારત માટે એક મુખ્ય મુદ્દો છે, અને બંને દેશોની કંપનીઓ વચ્ચે સહયોગ સતત વધી રહ્યો છે.

આ પણ વાંચો :દેશની સર્વશ્રેષ્ઠ પોલીસ હોકી ટીમ કઈ? રાજકોટમાં જામ્યો જંગ, DGPના હસ્તે ઓલ ઇન્ડિયા પોલીસ હોકી ચેમ્પિયનશિપનો પ્રારંભ

ચાર વર્ષ પછી ભારતની મુલાકાતે આવી રહેલા પુતીનને લીધે દિલ્હી હાઇ એલર્ટ પર છે. આશરે 130 સભ્યોના રશિયન પ્રતિનિધિમંડળ સાથે પુતિનના આગમન માટે કડક સુરક્ષા વ્યવસ્થા કરવામાં આવી છે.તેઓ ભારતમાં 30 કલાક માટે રોકાવાના છે.

દિલ્હીમાં તાજેતરના બોમ્બ વિસ્ફોટો બાદ સુરક્ષા પહેલાથી જ હાઇ એલર્ટ પર હતી. પુતિનની મુલાકાત માટે હવે વધારાની સાવચેતી રાખવામાં આવી રહી છે. પુતિન ગુરુવારે સાંજે પીએમ મોદી સાથે ખાનગી રાત્રિભોજન થશે, ત્યારબાદ દ્વિપક્ષીય વાટાઘાટો થશે. 5 ડિસેમ્બરે વ્યાપારિક બેઠકો અને રાજ્ય ભોજન સમારંભનું આયોજન કરવામાં આવ્યું છે.

પુતીનની આ મુલાકાત સંદર્ભે  રશિયન એડવાન્સ સિક્યુરિટી ટીમના 50 થી વધુ સભ્યો પહેલાથી જ આવી ચૂક્યા છે. તેઓએ રૂટ, સ્થળો અને એકંદર સુરક્ષા આયોજનનું નિરીક્ષણ કર્યું છે. રશિયન સ્પેશિયલ ફોર્સ આંતરિક વર્તુળમાં રહેશે અને ભારતીય દળો સાથે સંકલન કરશે.

ભારતમાં આ સુરક્ષા વ્યવસ્થા માટે દિલ્હી પોલીસ, કેન્દ્રીય સુરક્ષા, અર્ધલશ્કરી દળો અને NSG કમાન્ડો મુખ્ય ભૂમિકા ભજવશે. કોઈપણ ખતરાનો તાત્કાલિક જવાબ આપવા માટે SWAT ટીમો, આતંકવાદ વિરોધી ટુકડીઓ અને ઝડપી પ્રતિક્રિયા દળોને વ્યૂહાત્મક સ્થળોએ તૈનાત કરવામાં આવ્યા છે. જયારે પુતિનની વ્યક્તિગત સુરક્ષામાં રશિયાના 50 થી વધુ કર્મચારીઓને જવાબદારી સોંપવામાં આવી છે. . તેમનો ખોરાક રશિયાથી મંગાવવામાં આવશે અને ઘણી તપાસ પછી જ પીરસવામાં આવશે. તેમની સાથે એક પોર્ટેબલ સુરક્ષા કીટ પણ હશે, જે તેમની કાર અને હોટલમાં રાખવામાં આવશે.

પુતિનના કાફલાના માર્ગ પર ટ્રાફિક ડાયવર્ઝન ગોઠવવામાં આવશે, પરંતુ જાહેર અસુવિધા ઘટાડવા માટે સલાહ આપવામાં આવશે.બધા વિસ્તારોને અગાઉથી સાફ અને સુરક્ષિત કરવામાં આવી રહ્યા છે. સુરક્ષા કારણોસર પુતિનના રહેઠાણની વિગતો ગુપ્ત રાખવામાં આવી રહી છે. સુરક્ષા ફક્ત માણસો પર જ નહીં, પણ ટેકનોલોજી પર પણ આધાર રાખે છે. મિનિટ-ટુ-મિનિટ રીઅલ-ટાઇમ મોનિટરિંગ માટે આધુનિક સાધનો સ્થાપિત કરવામાં આવ્યા છે.

• એન્ટી-ડ્રોન ગન: હવાઈ ખતરા સામે રક્ષણ માટે ડ્રોન-શૂટિંગ ગન તૈનાત કરવામાં આવી છે.

• મૂવિંગ ડ્રોન સર્વેલન્સ: ઉડતા ડ્રોન દ્વારા ડ્રોનનું સતત નિરીક્ષણ કરવામાં આવી રહ્યું છે.

• સીસીટીવી અને સિગ્નલ મોનિટરિંગ: રશિયન પ્રતિનિધિમંડળનું એરિયલ, સિગ્નલ અને ગ્રાઉન્ડ-લેવલ સર્વેલન્સ. ફેસ રેકગ્નિશન કેમેરા કાફલાને ટ્રેક કરશે.

દિલ્હી પોલીસ કંટ્રોલ રૂમમાં 24×7 મોનિટરિંગ ડેસ્ક સ્થાપિત કરવામાં આવ્યો છે. કોઈપણ ભૂલો અટકાવવા માટે બધી એજન્સીઓ રીઅલ-ટાઇમમાં સંકલન કરશે. તાજેતરના દિલ્હી વિસ્ફોટો પછી આ વ્યવસ્થા વધુ કડક બની છે.

નિષ્ણાતો કહે છે કે પુતિનની સુરક્ષા વિશ્વની સૌથી કડક સુરક્ષા વ્યવસ્થાઓમાંની એક છે, તેથી ભારત-રશિયાનો સંયુક્ત પ્રયાસ સંપૂર્ણ સુરક્ષા પ્રદાન કરશે.