અર્થતંત્રની ગાડી પુરપાટ: GDP અનુમાનથી પણ વધુ! અમેરિકાનાં ટેરીફ હુમલા છતાં ભારતમાં આર્થિક ગતિવિધિમાં તેજી

અમેરિકાના ટેરીફ હુમલા છતાં ભારતમાં આર્થિક ગતિવિધિમાં ભારે તેજી જોવા મળી છે અને વર્ષના બીજા ક્વાર્ટરમાં અનુમાન કરતા પણ વધુ વિકાસ હાંસલ કર્યો છે. શુક્રવારે જાહેર થયેલા જીડીપીના આંકડા જોતા એટલું તો સ્પષ્ટ કહી શકાય કે ભારતીય અર્થતંત્રની ગાડી પુરપાટ દોડી રહી છે.

નેશનલ સ્ટેટિસ્ટિકલ ઑફિસ એ શુક્રવારે નાણાકીય વર્ષ 2025-26 ના બીજા ત્રિમાસિક (Q2) માટે ભારતનો ગ્રોસ ડોમેસ્ટિક પ્રોડક્ટ એટલે કે જી.ડી.પી. વૃદ્ધિ દર જાહેર કર્યો છે. સપ્ટેમ્બરમાં પૂરા થયેલા બીજા ક્વાર્ટરમાં ભારતનો જીડીપી 8.2 ટકા વધ્યો હતો. નોંધનીય છે કે છેલ્લા છ ક્વાર્ટરમાં આ સૌથી વધુ છે.

ભારતીય અર્થતંત્રે નાણાકીય વર્ષ 26 ના બીજા ક્વાર્ટરમાં (જુલાઈ-સપ્ટેમ્બર સમયગાળો) 8.2 ટકાનો મજબૂત વિકાસ દર હાંસલ કર્યો છે, જે પાછલા નાણાકીય વર્ષના સમાન સમયગાળાના 5.6 ટકાના વિકાસ દર કરતા નોંધપાત્ર રીતે વધારે છે. આ માહિતી શુક્રવાર ના રોજ આંકડા અને કાર્યક્રમ અમલીકરણ મંત્રાલય દ્વારા આપવામાં આવી હતી. આનાથી નાણાકીય વર્ષ 26 ના પ્રથમ છ મહિનામાં વિકાસ દર 8 ટકા થયો છે, જે નાણાકીય વર્ષ 25 ના પ્રથમ છ મહિનામાં 6.1 ટકા હતો.

આ પણ વાંચો :Adhik Maas 2026: આ વર્ષે ભાવિકોને પુરુષોત્તમ માસનો લાભ મળશે,જેઠ મહિનાથી શરૂ થશે અધિક માસ

નેશનલ સ્ટેટિસ્ટિકલ ઑફિસ દ્વારા જાહેર કરવામાં આવેલા ડેટા અનુસાર નાણાકીય વર્ષ 2025-26ના બીજા ક્વાર્ટર (જુલાઈ-સપ્ટેમ્બર)માં ભારતની અર્થવ્યવસ્થાએ મજબૂત પ્રદર્શન કર્યું હતું. જે દર્શાવે છે કે દેશમાં આર્થિક ગતિવિધિઓમા તેજી બનેલી છે.

જીએસટી દર ઘટાડા પછી વપરાશમાં વધારો થવાની ધારણામાં ફેક્ટરીઓએ ઉત્પાદન વધાર્યું, જેના કારણે વૃદ્ધિ દરમાં તીવ્ર ઉછાળો આવ્યો. સત્તાવાર ડેટા અનુસાર સમીક્ષા હેઠળના ત્રિમાસિક ગાળામાં ઉત્પાદન ક્ષેત્રે 9.1 ટકાનો વધારો થયો છે. ગયા નાણાકીય વર્ષના સમાન સમયગાળામાં આ વૃદ્ધિ માત્ર 2.2 ટકા હતી. દેશના જીડીપીમાં ઉત્પાદન ક્ષેત્રનો ફાળો 14 ટકા છે.

બધાની મહેનતનું પરિણામ : નરેન્દ્ર મોદી

જીડીપીના ફૂલગુલાબી આંકડાઓ જાહેર થયા બાદ વડાપ્રધાન નરેન્દ્ર મોદીએ ટવીટ કરીને ખુશી જાહેર કરી છે. તેમણે કહ્યુ છે કે, આ ઉત્સાહજનક આંકડા છે અને સૌની મહેનતનું પરિણામ છે. આવનારા સમયમાં પણ આર્થિક સુધારા ચાલુ જ રહેશે.

સોમવારથી સંસદનું શિયાળુ સત્ર

સંસદનું શિયાળુ સત્ર તા. ૧ ડીસેમ્બરને સોમવારથી શરુ થઇ રહ્યુ છે અને આ સત્ર ભારે તોફાની બનવાની શકતા છે. વિપક્ષ એસ.આઈ.આર.નાં મુદ્દે સરકારને ઘેરવાની નીતિ બનાવી રહ્યો છે તો એન.ડી.એ. સરકારની ઉપલબ્ધી, જી.ડી.પી.ના આંકડા અને વંદેમાતરમના 150 વર્ષની ઉજવણી સહિતના મુદ્દે ચર્ચા કરવા માગે છે. વંદેમાતરમ માટે ખાસ ચર્ચા પણ થઇ શકે છે. આ ઉપરાંત સરકાર 10 જેટલા મહત્વના ખરડો રજૂ કરવાની યોજના પણ ધરાવે છે. દરમિયાન આ સત્ર શાંતિથી ચાલે તે માટે મંત્રી કિરન રીજીજુએ સર્વપક્ષીય બેઠક પણ બોલાવી છે.