ગોંડલમાં ઓઇલ મિલના માલિક સાથે છેતરપિંડી: 300 તેલના ડબ્બા મંગાવી કડીના બે શખ્સોએ 5.45 લાખનો ધૂમ્બો માર્યો
ગોંડલના ભોજપરામાં ઓઈલ મિલ ચલાવતા મહિલા વેપારી પાસેથી 300 ડબ્બા તેલ મંગાવી કડીના બે શખ્સોએ 5.45 લાખની છેતરપિંડી આચરી હતી. બંનેએ બે વખત લીધીલા તેલના ડબ્બાનું રેગ્યુલર પેમેન્ટ કર્યા બાદ પેઢીમાં જીએસટીની રેઇડ પડી હોવાનું કહીને હાથ ખંખેરી લેતા સમગ્ર મામલો પોલીસ મથકમાં પહોંચ્યો હતો.
આ અંગેની વિગતો મુજબ, ગોંડલ રાજહંસ રેસિડેન્સમાં રહેતા અને ભોજપરા ગામે મમતા ઇન્ડસ્ટ્રીઝના નામે ઓઈલ મિલ ચલાવતા અલ્પાબેન દિપકકુમાર શાહે ગોંડલ તાલુકા પોલીસ મથકમાં આરોપી તરીકે રાજેશ અમૃતભાઈ પટેલ ( રહે. કરસનપુરા, તા. કડી, જી. મહેસાણા) તેમજ જીગ્નેશ રજનીભાઈ પટેલ ( રહે. કરસનપુરા, તા. કડી, જી. મહેસાણા) સામે ફરિયાદ નોંધાવતા જણાવ્યું હતું કે, આઠ મહિના પહેલા રાજેશ પટેલ નો ફોન આવેલો અને પોતે પણ રાંદલ કૃપા ટ્રેડિંગ ના નામે તેલનો વ્યવસાય કરતો હોવાનું જણાવી જરૂર પડ્યે તેઓને ત્યાંથી તેલ મગાવશે તેવું કહ્યું હતું. જે બાદ બે વખત તેણે તેલના ડબ્બા મંગાવ્યા હતા જેનું પેમેન્ટ પણ આપી દીધું હતું.
બાદમાં ગત તારીખ 16/6/25 ના રાજેશે 150 ડબ્બા તેલ મંગાવ્યું હતું જે મળી જતા પૈસા આપવાનું કહેતા રાજેશે 2 દિવસમાં આપું તેમ કહ્યું હતું જો કે બે દિવસ બાદ રાજેશના પાર્ટનર જીગ્નેશનો ફોન આવ્યો હતો અને વધુ 150 ડબ્બ તેલ મોકલવા જણાવ્યું હતું. અગાઉ બે વાર મંગાવેલ તેલના ડબ્બાનો હિસાબ રેગ્યુલર હોય જેથી અલ્પાબેને વિશ્વાસ આવતા તેઓએ વધુ તેલના ડબ્બા મોકલી આપ્યા હતા. આમ 300 ડબ્બા તેલના રૂપિયા 6.45 લાખ લેવાના નીકળતા હતા. આ હિસાબ અંગે બને 1 લાખ મોકલી આપેલ પરંતુ બાકી રહેતા રૂપિયા માગતા પોતાને ત્યાં જીએસટીની રેઇડ પડી હોય અને બેંક એકાઉન્ટ હાલમાં બંધ છે તેવા અનેક બહાને બતાવ્યા હતા.
જો કે લાંબો સમય સુધી બંને રૂપિયા ન આપતા અલ્પા અલ્પાબેન તેમના ઘરે ગયા જ્યાં આરોપીના ઘરના સભ્યોએ બંને ક્યાં છે તે અંગે ક્યાંય જાણતા ન હોવાનું જણાવ્યું હતું. તપાસ કરતા બંનેએ આવી જ રીતે બીજા વેપારીઓને પણ પોતાનો શિકાર બનાવ્યા હોવાનું સામે આવ્યું હતું. સુરેદ્રનગર બી ડિવિઝન પોલીસ મથકમાં પણ ગુનો નોંધાઈ ચૂક્યો છે. ઘટના અંગે ગોંડલ તાલુકા પોલીસે ગુનો નોધી વધુ તપાસ હાથ ધરી છે.
