કપિલ શર્માના કેફે ઉપર ગોળીબાર કરાવનાર માસ્ટરમાઈન્ડ ઝડપાયો : દિલ્હી પોલીસને મોટી સફળતા,પંજાબ આવ્યો’ને દબોચી દીધો

કેનેડામાં કોમેડિયન કપિલ શર્માના કેપ્સ કાફે ઉપર થોડા થોડા દિવસના અંતરે ત્રણ વખત ગોળીબાર કરાવનાર માસ્ટરમાઈન્ડ એવા બંધુમાનસિંહ સેંખોની દિલ્હી પોલીસે ધરપકડ કરી છે. આ ગેંગસ્ટર કેનેડાથી પંજાબમાં આવ્યો હોવાની બાતમીના આધારે પોલીસે તેને દબોચી લીધો હતો. આ આરોપીએ શૂટરોને હથિયાર સપ્લાય કર્યા હતા તેવું પોલીસનું કહેવું છે.

આ આરોપી ગોલ્ડી ઢિલ્લોન ગૅંગનો ભારત-કૅનેડા આધારિત હેન્ડલર હોવાનું કહેવાય છે અને તેની સામે અનેક ગુનાહિત કેસ નોંધાયેલા છે. ક્રાઇમ બ્રાન્ચે તેની પાસેથી એક હાઈ-એન્ડ PX-3 પિસ્તોલ અને 8 જીવતા કારતૂસ જપ્ત કર્યા છે.

કૅનેડાના સરે વિસ્તારમાં આ વર્ષે જુલાઈમાં ખુલેલા કપિલ શર્માના ‘કૅપ્સ કૅફે’ને સૌપ્રથમ 10 જુલાઈએ અજાણ્યા લોકોએ નિશાન બનાવ્યું હતું. ત્યારબાદ 7 ઑગસ્ટ અને 16 ઑક્ટોબરે કૅફે પર વધુ બે હુમલા થયા હતા. સદનસીબે, આ ત્રણેય ઘટનાઓમાં કોઈને ઈજા થઈ ન હતી.

ગોળીબારની ઘટના પછી અમારા ગ્રાહકો વધ્યા છે :શર્મા

મુંબઈમાં કપિલ શર્માએ આ ઘટનાઓ અંગે પ્રતિક્રિયા આપતા કહ્યું હતું કે તેમના કૅફે પર ફાયરિંગની આ ત્રણ ઘટનાઓએ કૅનેડિયન અધિકારીઓને દેશમાં આવા હુમલાઓ સામે પગલાં લેવાની ફરજ પાડી છે. તેમણે કહ્યું કે “મને લાગે છે કે ત્યાંના નિયમો અને પોલીસ પાસે કદાચ આવી ઘટનાઓને નિયંત્રિત કરવાની શક્તિ નથી. પરંતુ જ્યારે અમારો કેસ થયો, ત્યારે તે સરકાર પાસે ગયો અને કૅનેડાની સંસદમાં તેના પર ચર્ચા થઈ હતી.”

આ પણ વાંચો :કિયારા અને સિદ્ધાર્થ મલ્હોત્રાની દીકરીની પહેલી તસવીર આવી સામે : કપલે લાડકવાયીનું નામ કર્યું રિવિલ,જાણો શું છે નામનો અર્થ

કપિલ શર્માએ હુમલાઓ છતાં પોઝિટિવ દૃષ્ટિકોણ અપનાવતા કહ્યું કે, “વાસ્તવમાં, ગોળીબારની દરેક ઘટના પછી, અમારા કૅફેમાં વધુ સંખ્યામાં લોકો આવ્યા છે. તેથી જો ભગવાન મારી સાથે છે તો બધું બરાબર છે.” તેમણે જણાવ્યું કે હુમલાઓ પછી ઘણા લોકોએ તેમનો સંપર્ક કર્યો હતો.

શર્માએ વધુમાં ઉમેર્યું, “મારું માનવું છે કે ભગવાન જે કંઈ પણ કરે છે, તેની પાછળની સ્ટોરી આપણને ખબર પડતી નથી… મને ત્યાંથી ઘણા લોકોના કૉલ આવ્યા જેમણે મને જણાવ્યું કે ઘણું બધું થઈ રહ્યું હતું, પરંતુ મારા કૅફેમાં ગોળીબાર થયા પછી, આ એક સમાચાર બની ગયા છે અને હવે ત્યાં કાયદો અને વ્યવસ્થાની સ્થિતિ સુધારવા માટે પગલાં લેવામાં આવી રહ્યા છે.”