ભારે કરી: અશ્વિનને પણ IPLની ટિકિટ નથી મળતી !!

પોતાના બાળકો માટે ટિકિટ શોધી રહ્યો છે

ભારત વતી ૫૦૦ ટેસ્ટ વિકેટ લેનારા સ્ટાર ક્રિકેટર રવિચંદ્રન અશ્વિનને પણ આઈપીએલની ટિકિટ મેળવવા માટે મદદ માંગવી પડી રહી છે. આઈપીએલની ૧૭મી સીઝન ૨૨ માર્ચથી શરૂ થઈ રહી છે. આઈપીએલ-૨૦૨૪નો પ્રથમ મુકાબલો ધોની અને કોહલીની ટીમો વચ્ચે થશે. અશ્વિન આ મેચ માટે જ ટિકિટ શોધી રહ્યો છે ! આ મુકાબલો અશ્વિનના હોમટાઉન ચેન્નાઈમાં થવાનો છે. અશ્વિને આ મુકાબલા અંગે ટવીટ કર્યું કે ચેન્નાઈ-બેંગ્લોર મેચ માટે ટિકિટની માંગ બહુ વધુ છે. મારા બાળકો પણ આઈપીએલની ઓપનિંગ સેરેમની અને પહેલો મુકાબલો જોવા માંગે છે. અશ્વિને ચેન્નાઈ સુપરકિંગ્સ ટીમને ટેગ કરતા લખ્યું કે પ્લીઝ હેલ્પ. અશ્વિનના આ ટવીટ પર ત્રણ કલાકની અંદર હજારો લોકોએ રિ-પોસ્ટ કર્યું છે. ઉલ્લેખનીય છે કે અશ્વિન આઈપીએલમાં રાજસ્થાન રોયલ્સ વતી રમે છે. રાજસ્થાન રોયલ્સની ટીમ આઈપીએલ-૨૦૨૪માં પોતાના અભિયાનની શરૂઆત ૨૪ માર્ચે લખનૌ સુપર જાયન્ટસ સામેના મુકાબલાથી કરશે.