વ્હીસ્કીનું ટેટ્રા પેક જોઇને સુપ્રીમ કોર્ટ ચોંકી! જાણો શું છે ટેટ્રા પેક વ્હિસ્કી? રાજ્ય સરકારોને લગાવી ફટકાર
સુપ્રીમ કોર્ટની બે જજની બેંચ એ સમયે ચોંકી ઉઠી કે જયારે ચાલુ કાર્યવાહીએ તેમની સામે વ્હીસ્કીનાં ટેટ્રા પેક રાખવામાં આવ્યા હતા. જસ્ટીસ સૂર્યકાંત અને જસ્ટીસ જોયમાલ્યા બાગ્ચીને એ જાણીને નવાઈ લાગી કે હવે વ્હીસ્કી બોટલની સાથે સાથે આવા પેકમાં પણ મળવા લાગી છે. આ પેક અસ્સલ ફ્રુટ જ્યુસના જે ટેટ્રા પેક બજારમાં મળે છે તેવા જ હતા.
સુપ્રીમ કોર્ટે આ અંગે રાજ્ય સરકારોને ફટકાર લગાવી હતી અને કહ્યું હતું કે, રાજ્ય સરકારો લોકોના આરોગ્યની ચિંતા ઓછી કરે છે અને મહેસુલી આવકની વધુ ચિંતા કરે છે. સુપ્રીમ કોર્ટે દારૂનું આ રીતે ટેટ્રા પેકમાં થતા વેંચાણ સામે ભારે નારાજગી વ્યક્ત કરી હતી અને કહ્યું હતું કે, આવા પેક સ્કુલ-કોલેજના વિદ્યાર્થીઓને ખુબ જ સરળતાથી મળી શકે છે. આવા પેક દેખાવમાં પણ ભ્રમ ઉભો કરે છે અને તેને લીધે માતા-પિતાને પણ ખબર પડતી નથી કે તેમાં દારૂ હોઈ શકે છે.
આ ટીપ્પણી ત્યારે થઈ કે જયારે વ્હીસ્કીનાં બે બ્રાંડની વચ્ચે ટ્રેડમાર્કને લઈને થયેલા વિવાદમાં સુનાવણી ચાલી રહી હતી. ‘ઓરીજીનલ ચોઈસ’ બ્રાંડની દારુ બનાવતી જ્હોન ડીસ્ટલરીઝ અને ‘ ઓફિસર્સ ચોઈસ’ બ્રાંડની દારુ બનાવતી એલાઈડ બ્લેન્ડર્સ એન્ડ ડીસ્ટલરીઝ વચ્ચે ટ્રેડમાર્કનો વિવાદ ચાલી રહ્યો છે.
સીનીયર વકીલ મુકુલ રોહતગીએ બંને કંપનીના ઉત્પાદનો (બોટલ અને ટેટ્રા પેક ) રજુ કર્યા હતા. વ્હીસ્કીનું ટેટ્રા પેક જોઇને જસ્ટીસ અચંબામાં પડી ગયા હતા અને આવા પેક બનાવવાની મંજુરી છે કે કેમ તે જાણવા માગ્યું હતુ. મુકુલ રોહતગીએ કહ્યું હતું કે,આ પ્રકારના ટેટ્રા પેકનું વધુ વેંચાણ થઇ રહ્યુ છે કારણ કે તે સસ્તા મળે છે.આ કાર્યવાહીનો એક ભાગ રહેલા એડવોકેટ અભિષેક મનુ સિંઘવીએ પણ કહ્યું હતું કે, રાજય સરકારોને માત્ર પૈસાની આવકમાં રસ છે.આ ટેટ્રા પેક દારૂના છે એ જ ખબર પડતી નથી અને તેના ઉપર કોઈ પ્રકારની વોર્નિંગ પણ નથી છાપેલી.
જસ્ટીસ સૂર્યકાંતે કહ્યું હતું કે, શું આવા પેકેજિંગની મંજુરી મળવી જોઈએ..આવા પેક સ્કુલ-કોલેજમાં સરળતાથી લઈ જઈ શકાય છે. આવા ટેટ્રા પેક જોઇને લાગતું જ નથી કે તેમાં દારૂ હશે. આવા પેક ઉપર કોઈ પ્રકારની ચેતવણી પણ નથી.
જસ્ટીસ બાગ્ચીએ કહ્યું કે, રાજ્ય સરકારો મહેસુલી આવકની લાલચમાં લોકોના આરોગ્ય સાથે સમાધાન કરી રહી છે.
કોર્ટે આ મામલાને ગંભીર સાર્વજનિક હિતનો ગણાવ્યો હતો અને કહ્યું હતું કે, આ અંગે વિસ્તૃત ચર્ચાની જરૂર છે. કોર્ટે હાલમાં ચાલી રહેલા મામલામાં સમાધાન કરવા પણ જણાવ્યું હતું.
