હત્યાના આરોપીને ન ઓળખી શકતા પરિવારે યુવકને ઢોર માર માર્યો

જસદણનો બનાવ : સુરતમાં થયેલી હત્યા નજરે જોયા બાદ યુવકે આરોપીને ઓળખી ન શક્યો હતો 

જસદણના યુવકે સુરતમાં થયેલી હત્યા નજરે જોઈ હતી. અને તેને આરોપીની ઓળખ પરેડ કરવાની હતી. પરંતુ યુવક ઓળખ પરેડમાં આરોપીને ઓળખી ન શકતા તેનો ખાર રાખી તેંઆ પર હુમલો કરવામાં આવ્યો હતો.

બનાવ અંગે જસદણમાં ગંગા ભુવન શેરીમાં રહેતાં તૃષિતભાઈ ભરતભાઈ ધોરડા (ઉ.વ.27) એ નોંધાવેલ ફરીયાદમાં આરોપી તરીકે તેજસ ભરત રાઠોડ, તેજસનો કૌટુંબિક ભાઈ લાલો, લાલાનો ભાઈ, તેજસના કાકા ભરતનું નામ આપતાં જણાવ્યું હતું કે, અગાઉ તે સુરત રહેતા હોય ત્યાં અજય કિશોરભાઈ રાઠોડનું મર્ડર થયાનું નજરે જોયેલ હોય જેથી ઓળખ પરેડમાં આરોપીને ઓળખી શકેલ ના હોય ત્યારથી તેના પરિવારને તેમની ઉપર ખાર રાખેલ હતો, જેથી અજયના ભાઈ તેજસ  રાઠોડ તેમને ચાલુ ગાડીએ પથ્થરનો ઘા કરી ગાડી ઊભી રાખી અને તેજસ તેના મમ્મી તથા તેના કાકા ભરત પણ ઘસી આવી ઢીકાપાટુનો માર માર્યો હતો. જેથી આ મામલે પોલીસે ગુનો નોંધ્યો છે.